2020-07-31
公民黨被DQ,反對路線只餘「單程路」
喺全城都等緊政府正式公布延後立法會選舉之際,選舉新聞未得閒過,周四(30日)政府公布「第一輪」DQ名單,共有12人被DQ,包括有4位現任泛民議員,令到一個小小嘅地方選舉再次被納入國際視野之內。
周四公布嘅12名DQ名單之中,部分人的確係意料之中,包括曾經高調支持港獨嘅、支持外國制裁中國同香港嘅,甚至唔肯簽確認書嘅,被DQ只係遲定早。問題係選舉主任今次DQ咗四位公民黨候選人(三人係現任議員),仲有會計界嘅梁繼昌,呢個舉動真係史無前例,大有重新劃過「龍門」界線嘅意味。
公民黨係律師黨,又經歷過幾次DQ事件,早已經摸清政府條線點劃,亦充分考慮法律層面而作出部署從而避免被DQ,點知都係要被「一Q清袋」。從中聯辦隨後發出嘅聲明可以睇到,入唔入到閘選立法會,要睇候選人平時嘅言行,「想癱瘓特區政府、顛覆國家政權、全面「攬炒」香港,怎麼可能真誠擁護《基本法》和效忠國家、效忠香港特別行政區」,呢條紅線已經劃得清清楚楚,只要講過又或平時表達出來令人有以上嘅感覺,已經足以成為DQ嘅理由。
雖然暫時只係得12人被DQ,包括民主黨亦未有人被取消資格;但Tina相信,喺政府正式公布延後選舉之前,仍會陸續有候選人被DQ。不過,如果政府中人真係玩政治的話,理應會對民主黨留有一手,起碼唔會全黨DQ,除咗係話畀外國社會知唔係反親政府都無得入閘之外,亦都對外表述阿爺係容許反對聲音;之不過,反對嘅只係單程路,只能「對政府施政提出異議,但絕不容許任何宣之於口癱瘓政府」。最最最重要嘅政治操作係,咁樣可以打擊傳統泛民嘅凝聚力,將民主黨置於更尷尬嘅位置。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】當局擬放寬九龍東商業區土地用途,有議員認為應推廣至全港都開放些少,你是否認同?► 立即投票