【開拓市場】品牌開副線＝成功？做好生意的第一步是學識「定位」

　　時裝嘅品牌非常多，當中好多品牌集團都有自己嘅副線品牌。唔同公司對開副線都有不同原因，除咗係想彌補主線品牌上嘅不足外，主要必定係以賺錢角度作考慮點，有的會因為主線品牌形象已經定形，但公司又想作少少方向上嘅改變，所以用副線建立一個新嘅品牌形象，或鞏固主線品牌形象；有的係想吸納不同年齡層／喜好／消費能力嘅客戶群，擴大市場份額；有的更係為開拓全新嘅生意模式，希望以副線「試水溫」。所以集團多數會從生意本體嘅「橫向」同「直向」層面出發，研究副線嘅定位同策略。

　　簡單嚟講，可以分兩個層面分析，主／副線生意屬同一類型或不同類型。兩者屬同類生意嘅情況較為常見，以時裝行業為例，可能主副兩者喺設計路線上有少少不同，但主要係用價錢平／貴或消費者層面作分割線，希望吸納喜愛主線、但又未必消費得起嘅消費者，又或者未適合自己層面嘅消費者，都可以投入集團嘅擁抱。例如Giorgio Armani（主）有 Emporio Armani（副），Armani Junior（副）等；Prada（主）有Miu Miu（副）等。

　　一般而言，主線能夠為副線開路，將主線嘅顧客間接地帶俾副線。另一方面，因為副線較為便宜，同時間亦會抬高主線嘅檔次，令其更為鮮明，就算主線加價，副線都能夠吸納因加價而流失嘅顧客，對集團嚟講係進可攻退可守。亦有成功例子，有啲副線更為賺錢、更受歡迎。

　　如果主線同副線嘅生意模式唔同的話，大多係想利用副線「開條新血路」，或者以副線作補給，去配合主線嘅生意發展，希望製造synergy（協同效應）。例如ikea早喺1960年就開設自家餐廳，目的係為行攰嘅顧客提供休息空間，等佢哋食飽後繼續shopping。又或者集團想以副線作主線嘅延伸，用副線賺錢之餘，亦為主線鞏固其品牌形象，例如Agnès B本身係一個時裝品牌，但其賣花／朱古力生意，同時間亦幫咗主線建立更鮮明嘅格調。

　　生意開副線嘅成功例子有好多，但失敗嘅例子亦不少，只要有好好嘅定位同功能，主副兩者產生協同效應，可能有更好嘅驚喜。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票