【上司唔易做】兩難處境：面對下屬，到底是積極維護還是事不關己？

　　如果係普通同事，你可能會問一兩句有咩幫到手，然後佢有佢補鑊，我有我繼續工作。但下屬唔同，佢同你嘅關係可以話係連成一體，佢犯錯你同樣要揹鑊，佢做得好，你亦面上有光。

 

　　下屬犯小錯，你可能會話佢兩句，叫佢以後小心啲。但如果係大錯，I mean 錯到連大老細都知嘅嗰種錯，你又會點做？

 

　　有人為求自保，會同犯錯下屬立即割席，擺出一副事不關己嘅模樣。身為下屬，見到上司咁做，自然覺得呢個唔係一個可靠嘅上司，而外人見到呢位上司咁樣「照顧」下屬，最終兩面不是人。

 

　　有的上司會積極維護下屬，即使明知係下屬犯錯，仍然努力幫忙搵藉口，解釋下屬其實有苦衷芸芸。咁做表面上係幫緊下屬，但其實亦係幫緊自己，希望將自己管理不善嘅印象淡化。

 

　　又有一種上司既不割席，又不為下屬提供意見，擺出一幅愛理不理嘅模樣。

 

　　隔離 team Crystal 喺一個 event 期間得罪咗一個客，而嗰個客又咁啱係大老細嘅好朋友，所以件事嘅嚴重程度極速被提升至大氣層嘅高度。

 

　　Event 後第二日，大老細 call 齊各 team head 做 evaluation。大老細擘頭就問「有無人知 Crystal 現場係點覆個客？我就聽到有人反映佢現場好無禮貌。」

 

　　所有人嘅焦點即時放喺 Crystal 上司身上，但佢竟然畀出一個模棱兩可嘅答案：「咦，我都唔係太清楚，可能要直接問返 Crystal 先知。」

 

　　呢位上司不單止無即時了解件事嘅來龍去脈，而佢呢個答案更令人覺得佢對件事、對自己下屬毫不關心。

 

　　作為上司，你唔可以以為有下屬幫你做嘢就可以懶。相反，你要更勤力，睇實工作上嘅 quality 同 productivity 之餘，亦要照顧下屬嘅 conduct。

 

　　作為上司，狠心責罵下屬其實並不殘忍。無為而治，由得下屬自生自滅，忍心見到佢一錯再錯，呢種上司先係最殘忍。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇