民主黨委託香港民研進行「去留」民調，以決定未來一年係留定係走，民調噚日(21日)正式展開，去到28日，目標搵2400人做調查。而15名泛民議員已經表示會跟民調結果定去留，係部分功能組別嘅仲未正式表態。民調都未展開前，八十名反對派區議員已經急不及待表態，聯署去信各反對派立法會議員，要求佢地拒絕留低，企圖製造「大勢已去」嘅局面。

　　傳統泛民嘅心，喺近月嘅討論已經昭然若揭，睇下「鄺神」鄺俊宇都未有民調結果就已經講定點樣喺立法會跟進虐畜案件，完全一副「必定留低」嘅態度，講得好聽就係佢地兩手準備，講得唔好聽就係佢地無諗過輸，就算輸都會諗借口繼續留低。

　　Tina大膽預估，去留民調結果，支持「去」嘅應該穩佔超過一半以上。泛民如果真係信守承諾的話，應該要同立法會大樓說再會，全體留喺體制外做抗爭，資源欠奉，仲可能影響大部分人嘅曝光率，下年選戰要同進步民主派鬥唔係易事。

　　但萬一民調風係吹向傳統泛民陣營嗰面，要佢地留守的話，某程度上傳統泛民將會被進步民主派陣營進一步打為「戀權派」，坐喺議會多一年之後，未來一年將會受到「去派」嘅苦苦進逼；同時間，多位泛民議員仲過唔過到選舉主任「審查」一關參加下屆立法會選舉，特別係公民黨一眾議員，仍然有太多未知之數。

　　我敢肯定，無論民調結果如何，傳統泛民就好似今時今日匯控(00005)，要喺中西夾縫之中搵生存空間一樣，要喺傳統泛民同進步民主派之間搵到位企，呢個「Sweet Spot」係非常之難去搵。所以泛民嘅結局亦都係咁，左右難逢源之下，留定唔留，結局分別不大。Tina估計一年之後，傳統泛民喺議會嘅議席將會大縮減，日後議會「反對派」大旗，必然係由進步民主派擔正。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇