【女兒控上司】囡囡來公司「學習」，為何我反而覺得自己是零？

　　通訊應用程式如Whatsapp、Wechat害人有幾深就唔再講，畀上司日夜轟炸嘅經歷大家都應該試過。但唔知大家有冇試過遇到個好chill嘅上司，唔介意分享私人逸事；同時又係「女兒控」，最鍾意分享囡囡行跡畀大家，甚至帶囡囡同大家見面。非公事嘅嘢有時真係想啋佢都傻，但估唔到日日被呢啲無形資訊轟炸，你個玻璃心會無故被hurt？

　　先講講我哋會同囡囡嘅接觸點。事緣一次公事大家留守公司OT，上司見到大家咁勤力都老懷安慰，將大家嘅奴隸照post咗上私人嘅社交媒體上大讚大家。而囡囡見到呢張相，就覺得我哋呢班OT到深宵嘅中環人好專業、好Cool，繼而覆咗張喺餐廳度食嘢嘅自拍相畀上司，自嘲廢青冇貢獻，仲話好想見我哋學下嘢喎！上司forward咗個message畀大家，但大家望一望枱頭上果盒叉雞飯同相中嘅意、日fusion菜，再openrice先知間餐廳嘅價錢係「$801起」，就真係覺得果兩句「好專業好Cool」難聽過講粗口，但事情發展成點？上司緊係安排囡囡同大家食lunch啦！

　　午餐當日，一名打扮完全唔符合實際年紀嘅秒齡少女走進辦公室，先用一口流利嘅美式英文同大家打招呼，徐徐再直入上司房間，閂門隔絕我哋一班蟻民。閂門？又話嚟學嘢嘅？閂埋門學咩啊？大家淨係感覺到一股隔離感，由嗰道門傳出嚟嘅所有笑聲及英文，就好似恥笑緊我哋門外捱緊嘅打工仔。呢個時候，大家嘅手機震個不停，又係秘密WhatsApp group出動嘅時間。女同事留意，睇佢一身行頭：窄身little black dress、保暖小scarf、手提clutch、紅色高跟鞋以至全身首飾，無一樣唔係名牌。男同事留意嘅，不外乎都係外表同身材：講樣，你估真係個個都係沈月咩？但男同事一致都認同，佢嘅行為舉止滲透出一種普通人冇嘅自信感，係幾sexy嘅。食飯時大家輪流同囡囡自我介紹後，就冇再提及任何有關工作上嘅事，只不停share自己旅行嘅經歷。好在，阿姐我都去過幾次日本！（Sorry，咁失禮唔應該拎出嚟講）

　　到自費飯後，一行人返到office。前線兵繼續打仗，後面嘅將軍繼續同囡囡談笑風生。唔洗兩點，囡囡走出嚟同大家道別：「Hi all. So lovely to meet you guys and thank you for the lunch. I am gonna to do shopping now. It‘s so nice to meet you all. 」 好地地又講粗口？我哋就打生打死，你就出去shopping？買咪買囉，唔好同我哋講好冇？你搞到我哋覺得自己好冇用好可憐呀！藉口學嘢其實就持續hard-time我哋！不過我信佢哋唔知我哋咁玻璃心嘅，因為佢哋根本唔知低下階層原來可以咁低下。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇