2018-09-06

【履歷騙案】LinkedIn都可以Photoshop？可憐「受騙」同事幫手執手尾

　　當全世界都指控女人製造P圖「照騙」出嚟行騙，呃盡江湖之時，男人嘅P圖能力都開始慢慢抬頭，係「蛇精界」分一杯羹。雖然指控不斷，但就總有唔少人鍾情於呢種擺明製造出來的假仙女、假王子，甚至甘於被騙。至於辦公界江湖，原來都有唔少人鍾意將自己嘅履歷P圖。唔同嘅係，受騙嘅係HR或者腦細，但蒙受損失嘅係我哋呢班打工仔。一齊嚟睇下騙徒嘅行騙手法：

　　從前有個Manager位空缺，一日，team head話佢哋終於物色到新人選，而呢位即將空降嘅manager係前Lexus員工。一聽到Lexus，唔少有意換車嘅男同事、甚至無意換車嘅同事都眉飛色舞，諗住「就算佢已經再冇員工優惠，都總有舊同事或識得其他部門嘅人，可以畀到優惠換車」。所以，大家都好期待呢位新manager嘅降臨。On-board當日，welcoming lunch 一定唔少得，大家小心翼翼咁由淺入深，問起對方昔日嘅負責項目、工作經驗等等，再順勢問到重點：

　　「呀，咁你係Lexus有冇員工價可以買車㗎？」

　　「呃⋯⋯冇㗎，我哋冇優惠。」

　　之後新Manager就講及其他非Lexus有關嘅話題。起初，大家以為佢只係唔想煩，隨便敷衍同事話「冇」就算，作為成年人大家都明白嘅。但慢慢，大家發現佢經常有意無意避開Lexus話題，引起咗同事嘅疑心。卒之，同事上網一查，發現manager嘅LinkedIn中，Lexus一欄只係做咗3個月，緊隨嘅係半年嘅空白期。同事即刻明白點解佢會冇員工價，甚至唔願意提及當時嘅工作經驗，因為大家根本唔想去諗，其實佢係被炒的！你話啦，被人炒得，個人會有幾做得嘢？新manager嘅過去一傳十，十傳百。唔緊要，大家都認為要畀個機會佢，一於就睇吓佢辦事能力有幾高！可惜，「希望」係留畀主動嘅人，你唔主動出擊，淨係識得「希望」，最終大家就做到隻積咁之餘仲要幫佢執手尾。

　　受害同事卒之忍唔住，向team head投訴。呢個時候，「索料兵」同事發現新Manager嘅LinkedIn profile將Lexus嘅工作日期由三個月變咗做一年，而現公司嘅所有project，都畀佢attach晒落LinkedIn做external media。大家就估，唔知佢係咪聞到被投訴及被炒嘅味道，所以急急腳將前公司Lexus嘅3個月經驗改做見得人嘅1年，再即刻美化自己喺現公司嘅profile，令外界人有錯覺以為佢有份參與呢啲Project，從而對佢加分。唔知關唔關事，但呢位Manager喺短短3個月probation內就轉咗去另一間大公司，title被現有嘅更靚。但我相信一班同事不會去羨慕，反而應該喺Office開緊香檳慶祝！

《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇