2018-10-11

【一伏接一伏】租約期滿再搞入伙派對！難為同事又收「貼心」清單（下）

　　上星期Jacky用無恥嘅引蛇出動法，令唔少同事落搭，被迫送上housewarming昂貴禮物。但點都好，鬼叫自己貪埋啲小便宜，以為有免費私竇、酒水、小食提供，點知畀人反將一軍，賠了夫人又折兵就無謂怨啦。今個星期就講吓Jacky用咗咩賤招，令佢一而再、再而三咁成功呃到我哋一班同事奉上禮物！

　　喬遷派對完結後一年，大家開始對Jacky上年嘅house warming陷阱慢慢淡忘。講真，幾個人夾份買份禮物，最多都係人頭$500，再加上當晚真係有無限酒水、小食提供，大家都叫樂而忘返。所以對於被安排買禮物一事，都唔係好記仇，好快就唔記得。但一年後，起承轉合個「起」又再度出山！有租樓經驗都知道，租樓通常都係一年生約、一年死約。冇錯啦，死約一年已過，業主又係時間加租。租唔起？咁你扯啦～就係咁，Jacky喺死約完咗之後，就被業主加租迫遷。但呢個唔係一個可悲嘅打工仔故事，而係奸人掠水嘅故事。Jacky被業主迫遷後再度租樓，搬新屋喎，仲唔再Send個message出嚟？

　　「10月1日，慶祝中華人民共和國國慶以及Jacky仔被迫遷後重拾生命派對

　　為慶祝中華人民共和國國慶，Jacky終於飛起包租婆，投向另一包租熟女懷抱。如此有意義之日，本人已準備好31888發煙花及茶水，相約各位到宅欣賞狂歡！有意者回覆WhatsApp報名！」

　　一個熟口熟面嘅message由group中彈出。新同事們驚死唔去social往後冇好日子過，紛紛回覆報名；舊人如我，同大家喺whatsapp討論完後，都認為：「上次搬屋要送嘅都送晒，佢應該都冇嘢欠缺啦？今次我哋夾份買啲水果上去，如果佢再屈我哋買嘢，大家就企硬唔買！」齊齊做「死侍」報名踩場！結果如大家所想（如果唔係都唔會有呢篇花生文去唱佢），死亡shopping list又再出現，面皮厚嘅我哋今次緊係拒絕再送甚麼入伙禮物啦，難為一班新同事唔知頭唔知路中伏。

　　其實搬個屋啫，係咪真係有需要搞housewarming？喺我心目中，買樓先叫入伙，熟嘅咪送入伙禮物恭喜你咁叻仔，咁嘅時勢都買到樓；但我哋同Jacky只不過係同事，你一而再、再而三嘅搬屋呃我哋啲禮物，乞兒嚟架？有冇少少自尊心？有個同事講得好啱：「下次我換車都搞housewarming啦咁！」

《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇