用血滴子斬太子爺頭？太上王誓要炒無心同事

　　公司之中有咩比尊貴腦細更尊貴？一定係小腦細！不過，作為凡夫俗子嘅我地又有幾可有機會可以親眼目睹小腦細嘅存在呢？而作為一個圓滑而又有上進心嘅打工仔，假如有幸可以相伴小腦細，仲唔有咁大力得咁大力刷鞋、討佢歡心？今次事件，同事就因為太過專注擦鞋，忽略咗外界環境，差啲用血滴子係腦細面對將小腦細斬頭⋯

　　為咗畀大家對血滴子有初步了解，先形容「血滴子」為何物。血滴子為明末清初小說中記載嘅暗器，傳聞可以輕易取得人嘅首級，而且來無影去無蹤，瞬間致人於死地，被殺者往往連自己點死都唔知，係咪聽落恐怖得嚟又有啲熟口熟面呢⋯⋯

　　講番件事先！事源腦細老來得子，日日開心到個樣好似電影《沖天救兵》入面個伯伯一樣咁和藹可親，各位同事自然「扮」事都扮得開心啲喇！雖然腦細就冇好似李氏家族咁，向員工派利是賀新丁，但腦細一於打破你、我之間嘅隔膜，邀請各方好友以及一眾員工到佢間大宅探太子爺，實行以人氣旺一旺太子爺嘅前程！有腦細、又有權貴，上進一族緊係仆住參加喇；而我地一班摺埋嘅薯仔就出於好奇心，想睇吓高尚住宅及高尚Gathering究竟係咩玩法，都一樣舉手支持！

　　當日眾人除左瘋狂派卡片之外，另外一樣唔少得嘅事緊係幫B仔刷鞋喇！但要見太子爺一面都唔係咁易，同事C就放棄佢所有擴展人脈嘅機會，將職途All-in太子爺！虎視眈眈，幾經辛苦，同事C終於可以一睹太子爺嘅風采，仲有幸可以將佢抱入懷內！唔知係咪興奮得滯，同事C一手將B仔舉高過頭，用BB聲大叫一聲：「飛啊～」，但同事C正正企係豪華水晶吊燈之下，吊燈連風扇嘅扇葉一下下「片」落太子爺身驅上。霎時太子爺嚎哭大叫，眾人都跟住大叫，唔洗諗同事C心入面都大叫緊！老實講，傷勢就唔重嘅，但B仔就成身損哂，即刻畀專人凑返入房療傷。主角同事C都心知不妙，就算盡最後一點責任，向腦細查問太子傷勢，都被拒之門外。

　　刷鞋party不歡而散，無人打同事C都算好彩！所以佢諗住返公司時再用成年人嘅處理手法同腦細道歉。點知第二日返工，員工證都cut埋入唔到office，眼見門口一埋熟悉嘅物品，明顯畀人炒左喇！原來腦細寧願補通知金都唔願意再見到呢個人，要佢即日離開公司！果然，血滴子真係一件殺人不見血，死咗都唔知咩事嘅危險武器！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好