「聯合國」公司之不平等對待，份糧包㗎 ！ （下）

　　上回講到昔日年少無知嘅我，以為入左「聯合國」公司，就可以做個上等中環人。但面對外國同事、上司，各種種族歧視嘅對待，回想當日懵盛盛又天真嘅我，真係提起都想流眼淚。上星期提到嘅事件主要都圍繞尊重問題，但返工當然唔少得金錢瓜葛。所以今星期，我將會同大家分享有關錢銀問題以及晉升機會嘅不公平！

 

 

　　公司每到年頭都會同大家做appraisal去決定人工調整幅度以及bonus嘅多少。當年我嘅appraisal係所有項目都3/5分，平均分3。咦喂，Above Average喎，都唔差啦！但記得當年我收到appraisal之後，第一個感覺係「腦細hea做」！之於其他外國同事，最低分都有4分。但自問當年嘅我唔係最勤力，都係第二勤力，最起碼唔會好似外國同事咁日日彈閘，所以對於appraisal緊十分不滿！後來，我慢慢先發現腦細評分嘅標準！原來因為外國同事們較多同西人腦細食飯，咁食飯緊係講公事啦，唔通同腦細講同女朋友嗌交咩？就係因為講得多公事，老細知道你做緊乜，係知道你做緊咩咋，自然就覺得你個人有做野啦！

 

　　但對於其他不被列入「一齊食Lunch」嘅本地人，因為少同腦細交談，佢根本唔知你做緊咩，只係記得你日日瀨死係公司唔收工，浪費資源。而又因為Appraisal評分一定要整數，唔可以出現0.5分，比2分唔合格又唔係，所以是但比個剛剛合格嘅3分各位黃種人。最終，bonus、加人工啲資源咪去哂外國人身上，本地人執下死雞，係咁宜加下咪算囉！

 

 

　　另外一次晉升嘅例子就更離譜！事源公司有個m位空缺，決定由本地同事及意大利藉同事之中選拔，所以公司比咗個任務二人：某某Project Presentation決戰。二人為咗把握呢次晉升機會都出左好多心血同時間，但亞洲人做奴隸真係無人能敵，本地同事為咗個present足足通宵3晚。到左決戰當日，本地同事先表演，各位Manager以及大腦細都對本地同事嘅內容讚口不絕；再到意大利同事出招，佢竟然對住大腦細講以意大利文Present，唔洗講，大腦細緊係意大利仔啦！

 

　　各位聽唔明意文咪唯有自己睇Powerpoint囉，但一至都認為本地同事嘅內容較好。到咗結果出爐，緊係意仔贏咗啦，因為佢冧得掂意大利腦細呀嘛！但其實諗都諗到，由presentation去決定晉升唔Fair啦！點解唔直接用業績比賽？Present講野流利唔代表成績好，更加唔代表將來所有客人都識聽意大利文！如果當初係決意升意大利同事嘅，不如唔好搞個比賽出嚟折磨本地同事以及調戲我地一班本地薑啦！

 

 

　　好記得當年呢份「聯合國工」我做唔長，除咗得唔到尊重同公平對待之外，我對於同外國同事工作嘅Fantasy都完全改觀！不過，只要你一日仲係打工仔，你就有機會要同外國人共事，就需要面對呢種不公。冇辦法架，鬼叫你份糧包咩！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情