2020-07-08
《Make Money》直播拍賣紅遍兩岸,開心買開心賺!
你碌Facebook嘅時候,有冇發覺愈來愈多人做「網上拍賣」直播?其實,呢種玩意早幾年喺台灣已經興起:又話香奈兒三折,LV一折咁,睇到我心癢癢,巴不得佢地會將貨送嚟香港;終於,呢種新風氣近排都開始流到香港。究竟喺呢啲直播平台買嘢真係平啲?想加入又點應該點做呢?去文!
(Shutterstock圖片)
兩岸市場大,網紅單月成交高達千萬元!
(Shutterstock圖片)
疫情未爆發前,大家都已經習慣日淘夜淘;到疫情爆發後,更催生出網絡購物普及化,但直播拍賣其實又點運作呢?
作為「主播」,就梗係要Talk得又Sell得啦!近呢幾年來呢類直播平台都邀情電視台主持過檔,務求力谷人氣收視,例如曾經有「湖南衛視一姐」之稱嘅李湘曾獲邀做直播拍賣,單月成交額高達千萬元人民幣,可見呢種賣嘢方式真係有市場!
而台灣平台就更加成熟,叫賣方式都大同小異,但台灣人玩法更瘋狂!例如台灣主播連千毅曾經推出「零蚊起BID」,手錶手袋,統統零蚊起拍賣,叫到幾多就賣幾多!高峰時期線上用戶高達三萬幾人;但可惜,後來有其他台灣網紅踢爆,原來佢係賣緊假貨,最後被警方送辦。
女人錢容易搵? 主播或有兩三成分紅!
(Shutterstock圖片)
其實直播拍賣真係賣乜都有,榴槤、海味、牛扒,你諗得出都會搵到!不過點計都係女人錢好賺!所以直播平台普遍都係賣手袋、口紅、化妝品較多。而作為主播,除咗Sell得貨之外,仲要識講吓笑話、唱吓歌。一場直播幾個鐘,點樣留住班客仔?最緊要帶畀佢地歡樂,開開心心買!
咁做主播又有咩著數?通常主播都係同賣家拆帳,賣一件拆一件,一開始分成利潤可能得一成,但如果係當紅主播,分分鐘有兩三成!以大陸網紅李佳琦為例,一支唇膏出面鋪頭賣100至150蚊一支,網上直播可以賣平至7、80蚊,呢位網紅一個月賣到二萬幾支,成交金額約三百萬人仔左右,計及成本之後,推算佢單月淨袋20萬人仔!
人唔做我做,殺出條財路:先賣時令美食!
呢對「港夫廣妻」組合係抖音似乎有唔錯成績!(抖音截圖)
呢種玩意喺香港只係喺好起步階段,做緊嘅人都唔多,但都有港人嘗試開展新機遇,例如有位港青李劍禧同佢廣州老婆組成「港夫廣妻」組合,係抖音上面拍攝短片,順便幫朋友做埋直播拍賣,短片都起碼10幾萬點擊率以上!
香港人要做呢行的話,單單做本地市場有點困難,因為畢竟都係起步階段,而港人對於網上拍賣亦唔算太過熱衷。之不過,人唔做我做,殺出條血路!正正就係因為少競爭,想入行嘅人反而容易!參考內地網紅個案,建議可以首先以美食為主,例如而家係屬於榴槤、荔枝嘅季節,一入秋去到九、十月就係食大閘蟹,香港人咁為食,點都會有生意額;到主播累積一定知名主播度,可以嘗試推介下化妝品、護膚品之類,一步步踏上青雲路!
有藝人成首批香港「叫賣哥」,最緊要吸流量!
藝人張啟樂之前係香港做「叫賣哥」,不過而家去台灣發展!(張啟樂Facebook截圖)
前亞視藝員張啟樂(Ben)就係首批喺香港做起嘅「叫賣哥」!我細細個已經睇佢喺亞視做《開心大發現》,又同張家輝喺《中華賭俠》唱眼睛想旅行,加上佢又口才了得,做過DBC數碼電台主持,叫賣Sell嘢又點會難到佢呢!佢嘅「吃喝玩Vlog」嘅Page都有萬幾Followers,去年幫一間海味鋪做直播拍賣,兩小時已經有6位數成交,據聞佢自己都袋袋平安5位數佣金。
佢之前做直播都幾多人回應,而且好多人落單!(張啟樂Facebook截圖)
咁,係咪人人都可以做直播買賣?其實最緊要,就係要預留足夠嘅貨物存倉,有啲主播會選擇自己入貨自己賣,不過你就要承擔存貨風險。而消費者最緊要就係有優惠有禮品,除咗產品售價要平外面一大截之外,張啟樂試過,喺直播入面送演唱會飛吸流量,仲要係周杰倫演唱會飛!真係未做主播先打三十!係咪博得過,就要仔細思考啦。
不過張啟樂今年已經過去台灣發展,唔知佢會唔會繼續用「港仔」身份,喺台灣幫手Sell下啲香港特產呢?而喺香港嘅你,又會唔會諗吓自己自己做老闆,又做埋主播呢?
撰文:李皆穎
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】當局擬放寬九龍東商業區土地用途,有議員認為應推廣至全港都開放些少,你是否認同?► 立即投票