《Make Money》大灣區車位狂升？買賣唔止剩係睇價錢地區

　　近年來，唔少人都返大灣區投資，特別係區內樓盤；但原來呢一兩年連車位都狂升，有咩因由會咁好景呢？

 

(Shutterstock圖片)

　
僧多粥少真惡搞，神州車位需求大增

 

(Shutterstock圖片)

　　神州嘅汽車同經濟，喺2008年時候一齊起飛，當年全國汽車銷量只有800萬架，10年後已經升至2800萬架，不過車位增加數量就大落後。以佛山為例，2016年汽車數量達200萬架，但車位只有35萬個，特別係喺社區同商業中心，繁忙時間想搵個吉位停幾個鐘都難過登天啊陰功；另有機構話，深圳的停車位缺口仍在200萬個以上，該市龍華區甚至要政府出補助，鼓勵建立體停車庫。

 
　　所以，大灣區車位成為近呢幾年來升值最快嘅投資產品，例如廣州白雲區，夠曬人多繁忙啦！2016年一個車位均價係20萬人仔左右，去到2018年就已經升到去35萬人仔，足足升值75％，真係幾和味啦喂！
　
升值潛力大有樣睇，有充電車位叫價更高

 

(Shutterstock圖片)

　　正所謂「車位買得啱，賺錢贏到喊」，喺香港買車位就梗係喺豪宅區、中產區入手，貪佢容易搵買家轉手，幾十萬做首期買入嚟牽涉銀碼唔大；況而且香港車位長期緊張，如果唔賣甩，轉租畀人亦唔使驚租霸，佢唔交租即刻鎖卡，回報率有三、四厘都唔錯喎！

　　不過，喺神州買車位就唔同玩法啦！綜合各家意見，係內地買車位首要條件就係要有充電站！你知而家內地不論巴士的士都用晒比亞迪電動車，相信未來都係以電動車為主；此外，如果選擇小區附近嘅車位，可以搵啲0.6至0.9嘅比例，即係每千個單位，有600至900個車位，咁可以可以保證車位長期有需求啦！
　
車位產權要分清，人防＆產權大不同！

 

(Shutterstock圖片)

　
　　喺神州買車位唔止剩係睇價錢地區同有無得充電，仲有好多嘢要留意。其實唔止車位，買乜嘢都要先做足功課。

　　內地車位主要分為「產權車位」同「人防車位」，通常產權車位係發展商賣畀有單位嘅小業主；「非產權」車位就畀非業主買賣。而兩種產權買賣都要有產權證。另外有一種車位只係有「使用權」，只係喺一段有效時間內自用或出租，但相對地入場費較低，不過就無業權。

　　而有一種車位叫「人防車位」，業權係屬於國家，呢種車位係發展商根據內地法例而建，平時只係用做出租而非買賣，只可以有使用權，必要時候國家就會徵收返，大家要注意啦！

　　此外，投資內地車位有冇得賺，還要留意一大堆稅項，例如個稅、增值稅、印花稅等，分分鐘加埋可達20%，買之前計好數至下手方是王道。

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情