2022-12-29
老C的破陣子
有老友同我講,老C有冇搞錯,樓市如此淡靜,公司蝕錢蝕到要炒一半人,現在仲要出花紅,究竟點解。
老友唔明白,老C雖然是讀書人,但亦是戰將一名,在古代,應該被稱為儒將,老C知道樓市將會回復生機,在這個時候不但不會炒人,而且仲發花紅,希望伙記可以在未來一段時間博殺,就好似辛棄疾在破陣子所講,八百里分麾下炙,五十弦翻塞外聲。沙場秋點兵。知道就嚟要打仗,請部下食燒牛肉,食完就點指兵兵。
老友話冇理由,所有分析員測量師都話樓市淡靜,樓價繼續下跌,又點會突然間變到好似打仗咁旺。其實,千怪萬怪都怪老C,佢大力唱淡樓市,其他人只是執佢口水尾,但又難怪,老C是物業代理界泰山北斗,佢話跌又點會有人話升,所以齊齊唱淡,嚇到不少冇必要賣樓的人都賣樓,有需要的人又唔敢買樓,樓價又點會唔跌。
樓價雖然比高峰時下跌接近兩成,但成交量極低,令到代理搵唔到食,這亦是老C要炒人原因,如果成交量低,但成交樓宇的質素甚佳,代表很少人買樓,樓價會繼續下跌,但如果成交樓宇的質素甚差,代表很少業主賣樓,樓市即將反彈,近日成交樓宇的質素早在老C心中,知道樓市即將反彈,但欠缺了一個催化劑。
本來最佳催化劑就是撤辣,但政府表示堅決反對,但就放寬外來專才買樓印花稅,七年之後可以退回,與此同時,政府宣布搶人才,未來三年搶十萬專才,唔好忘記,專才的購買力比香港人大得多,有咁強大購買力,只有儍的人才會話樓市繼續下跌,老C有理冇理,一早發定花紅,伙記亦應該博命。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】有健身中心宣布全線暫時結業,議員指巨額預繳式長約並不合理,你日後若「入會」會更留意邊方面?► 立即投票