【打工仔哀歌】不再為1:42pm憂慮！2020勇敢跳出工作迷惘Cycle！

　　早前美國一項調查指，大部分打工仔覺得每日嘅 1:42pm 係佢哋最難受、最大壓力嘅一刻。通常上午主要都係處理緊琴日嘅手尾，覆晒所有email就已經冇咗一個上午。然後12:30pm－2pm食Lunch，而1:42pm正正係食完飯準備返公司嘅時間，一諗起返到公司迎接下半場時，就已經有想辭職嘅念頭。60%受訪者覺得工作到4:53pm都仲未有休息過，仲唔單止咁，超過25%嘅受訪者認為，每日都持續地感受到老細無比嘅壓力，明顯地講緊Non-office Hour老細嘅WhatsApp壓力。

　　另外，大部分打工仔都覺得，每日平均需要額外多3個幾鐘嘅時間，再加埋一星期要有8日，先至剛剛「夠用」。一星期要有8日，當「星期七」、「星期八」係weekend放假，即係一星期都要工作6日（可能星期七／八都要做），再每日額外多3個幾鐘，即每星期一共要工作66小時，先叫做能夠「正常」完成手上工作，遠超幾年前香港平均工作時數50小時好多。睇完都幾可悲，以為外國人生活成日都話「Work-life Balance」，實情係打工仔Work，老細就「Life Balance」。

　　打工仔經常會因為工作而迷惘，之後又會因為迷惘而繼續工作，然後無止境循環。其實老細就好少有呢個問題，因為老細好清楚自己想要啲乜野，同時亦夠膽向前衝。而「奴性」甚重嘅打工仔，就永遠諗唔通要做啲乜嘢，永遠都係迷惘地原地打圈。

　　其實迷惘係有一個Cycle，當你就嚟畢業、準備出嚟「自己顧自己」嘅時候就已經開始，之後大約每五、六年又會循環一次。剛剛畢業你會迷惘唔知做邊一個行業好；工作幾年又會因為唔知公司係咪適合自己，有轉工嘅念頭；之後過幾年高不成低不就，覺得工作好悶想轉行；又再過幾年差唔多三十幾歳，迷惘好唔好辭職自己創一番事業；再之後又會因為踏入成家立室嘅階段，有兒有女，又會因為平衡唔到工作同家庭而煩腦。

　　對工作／人生迷惘，好多時都係因為你對工作／人生嘅不滿而產生，呢啲不滿同金錢無關，唔會因為搵得多而開心咗，而係我哋永遠攞唔到「知足」同「開心」中間嘅平衡點。今年必定係艱難嘅一年，減／凍薪、裁員、失業、委屈做一份唔鍾意嘅工作。2020年，嘗試對自己好啲，勇敢地行一條自己想行嘅路，跳出呢個迷惘Cycle，做一份唔會為1:42pm而擔憂嘅工作。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》說說心理急救：遇危急事故應如何面對？點樣正確提供情緒支援？講錯說話容易造成二次傷害！► 即睇