每次見到一個新email 應否立即打開嚟睇？

　　有好多人習慣咗一見到一個新嘅email，就會即刻打開嚟睇，然後丟低手頭上做緊嘅工作，立即開始回覆。加上而家用手機工作實在太方便，一見到有關工作嘅WhatsApp、email嘅提示信息，無論你係搭緊車、食緊飯，定係臨瞓前，有好多人都會忍唔住打開嚟睇，繼而「胡思亂想」，然後回覆。所以當好多人話「我check一check email，好快」，其實絕對不可以盡信。

　　有好多人覺得咁做其實冇乜問題，甚至認為自己好有效率，因為所有email都喺人哋發送之後嘅30秒之內回覆。但久而久之，你做嘢嘅效率不但冇提升，反而會更低，因為你並唔係按照自己原定計劃，按優先次序工作，而係按照別人send email畀你嘅時間而工作。變相你工作嘅優先次序、重要性，亦大致等於你email inbox嘅次序。

　　咁講並唔係鼓勵你減少check email，而係希望你時刻提醒自己，要按照自己嘅計劃，檢視自己Outstanding Task list去工作。如果你自覺好奇心超強，一見到有新email就會分心的話，你可以嘗試調教電腦內email嘅提示方式（例如刪除Desktop Alert），幫助自己更專心工作。

　　喺辦公室工作，除咗email，當然仲有來自四方八面嘅「實體」同事，向你提出要求、查問工作進度，甚至同你吹水。尤其是marketing，公司內各個部門、任何職級都有可能靠近你，嘗試打斷你正在進行中嘅工作。

　　呢個時候，你就要懂得喺電光火石之間作出分析，權衡輕重。當刻欣然接受別人嘅要求，其實非常容易，亦可以避免尷尬氣氛，但你就可能要承受推遲其他更重要Deliverables嘅風險。學懂當面拒絕別人嘅要求，絕對係一種必需技巧，但拒絕並不代表無禮貌，亦不代表不負責任。向同事說明該項目將於何時完成，或相約同事兩小時之後先開會討論，可以做好期望管理，避免失望。

　　記得，無論覆email、WhatsApp，定係面對面對答，你Responsive，其實並不代表Productive。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》說說心理急救：遇危急事故應如何面對？點樣正確提供情緒支援？講錯說話容易造成二次傷害！► 即睇