創業的通病:冇策略冇gimmick

　　好多不同嘅媒體成日只會講創業成功嘅風光例子，久而久之大家就只會望到成功嘅一面，對創業有好多憧憬，而忽略咗失敗嘅原因，亦好少去review有乜問題。有數據指出，平均每100間創業公司中，就有90間會係兩年內倒閉，剩下果10間有9間會係5年內倒閉，到最後得一間真係叫創業成功。唔想最後跳進咗「創業墳墓」，辭職創業前，先問一問自己有冇以下嘅創業通病，為自己診一診症～

 

通病一：冇策略、冇gimmick 

 

　　呢個好重要，亦係大部份創業公司失敗嘅原因，好多創業者係開始之前，冇好好諗清楚自己公司有乜賣點，更加冇意識到，原來客人幫襯你而唔幫襯其他人，係一定要有一個強而有力嘅原因。聽落好似好理所當然，好似係人都知，但其實好多人都經常犯同樣嘅錯，佢哋諗住創業只要有心、勤力就一定會成功。但如果大家冇一個好完整嘅策略，你九成九唔洗一年就會倒閉。

 

　　一個好嘅策略可以有好多種，你亦可以同一時間打幾個策略，例如你可以打產品嘅定價、產品獨特性、市場供求等等，而你所定下嘅策略，一要定要有「比較」同「評分」。比較，係指你嘅策略同其他直接／間接競爭對手嘅比較，例如你嘅產品／服務比其他競爭對手新／快，整個市場都冇人可以取代你；又或者你嘅價錢較其他人平／貴，價錢平到你公司就算遠我都要幫襯你，或者價錢貴到人哋會愛上你間公司。

 

　　你冇聽錯，「價錢比較貴」都可以係賣點之一，外國／內地有好多公司會以「貴」做招來，吸引一班「虛榮心愛好者」幫襯，非常成功之餘profit margin亦相對可觀。

 

　　「比較」完後，你要將你成盤生意去評一評分。因為競爭對手有好多，如果只行單一嘅創業策略未必能夠令你致勝，所以要有比例地採用多項策略。而定下多種策略後就要評分，對比競爭對手你整體有幾分，可能策略（一）你低分啲，但策略（二）你比人高分，最後生意齊體係低分、剛剛合格、中上滿意，呢個分數正正反影出你創業贏面有幾高。如果你嘅生意係打獨特性，全港都冇你呢件產品，咁分數就必定高，贏面自然大，而GoGoVan喺呢點就做得幾好。

 

 

　　於2013年創業嘅GoGoVan，開創亞洲首個手機電召貨車app，創業一年，業務已經擴展到亞洲不同國家。2014年8月，有投資者投資650萬美元於GoGoVan拓展業務之上。創辦人Steven、Nick及Reeve於2010年第一次創業時，一開始並唔係創立GoGoVan，佢哋嘅第一門生意係BoxAd，於飯盒印上廣告以賺取廣告費用。其後佢哋發現生意最困難嘅地方唔係飯盒上嘅事情，反而係佢哋成日都搵唔倒貨車運貨，所以把心一橫放棄飯盒生意，專注貨車生意之上。

 

　　佢哋鑽研咗貨車生意一段時間，發現平時中間存在咗好多問題，例如司機唔想收距離太遠嘅call，由或者好多散單冇司機接，因為溝通問題而變成供求失衡，浪費咗好多資源。佢哋明白只要有一件創新易用嘅工具，就可以改變成個生態環境，從中賺取第一桶金。當年GoGoVan可以話係難以取代，找出問題，再為問題提供解決方法，製造其「獨特性」，就係一個成功嘅marketing 策略。但到咗今日市場競爭激烈，帶來咗不少挑戰，將來能唔能夠保持業績，就好睇佢哋有冇「持續性」嘅策略以配合市場需要，打贏競爭對手。

 

　　創業要有策略，記緊時刻問自己「如果我係客，點解我要用你？」

 

　　冇策略嘅創業，就等於有策略咁倒錢落海～（待續） 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情