竟然好work！日本小食店的「全職客人」，什麼都不做竟能令生意大增

　　「人流／人氣」對好多生意嚟講都好重要，由其係飲食業、零售業、商場等。要公司有人氣、吸引強勁人流入舖，只靠本身公司嘅「產品」同「服務」並唔足夠，因為公司產品同服務嘅好與壞，係好難一下子改變，好視乎顧客口味之餘，公司產品亦唔係話改就改。所以要贏，就要識得「請人」～

 

　　要引人客入舖，請靚仔靚女做員工係人都識，將佢哋放係當眼位置，吸引門外人流進入，當然係最簡單直接嘅方法，但好多公司只係識得放佢哋係店舖門口做佈景板，可以話係捉倒鹿唔識脫角，並未「物盡其用」。要將佢哋發揮至最大功用，「互動」先係王道～中國一間知名餐廳「黃太吉」，就好識利用呢一點。

 

　　早年黃太吉發展飛快，老細為咗好好打理業務，於是請咗六名「當家」作主，幫手打理公司日常事務。當中六當家Jeff 係美國人，靚仔大隻之餘，仲帶點怕羞，就因為咁引來為數不少嘅女士，中午專登嚟排隊為見六當家一面，風頭一時無量。CEO赫暢有見及此，特意安排客人與六當家互動體驗，例如與六當家猜拳，可以同六當家玩之外仲可以握手，勝出者亦可享小食優惠；仲有與六當家互動煎餅制作，近距離與六當家見面。黃太吉完全地善用靚仔員工，為公司打造一個好好品牌形象之餘，仲帶來好多人流同生意。

 

黃太吉六當家 Jeff

 

　　除咗請靚仔靚女員工之外，日本有公司仲會請一啲「吸引力強」嘅人做員工或者「顧客」，幫公司增加人氣、令生意大增。聽落好似好抽象咁，老實講係冇科學根據，但我就是信了，因為我自己本身都有呢種「技能」。

 

　　相信大家身邊都有呢啲人，佢哋天生好有「吸引力」，唔係因為佢哋靚仔靚女而較易吸引人，而係唔知點解佢哋就好似磁石一樣，就算乜都唔做，只要佢一出現，就會吸引咗好多人走埋佢身邊。日本曾經有公司就睇中咗呢一點，之後令其生意大增。

 

 

　　多年前日本一間小食店，公司老細有一日發現，有位熟客雖然唔係成日幫襯，但每次佢嘅出現必定會引來好多人進入店舖。老細靈機一觸， 於是請咗呢位顧客做「全職顧客」，特意安排佢係重要時段同埋非繁忙時段「返工」。 佢嘅工作好簡單，唔需要招呼客人，亦唔需要執枱打掃，只要求佢準時出現便可，自然地、靜靜地坐係度食飯飲野，做返自己，之後自自然然就有人「因為佢」而被吸引入舖。聽落好似好古怪咁，但當時據說係好work，後來呢間公司仲好似登廣告請人，指明要「吸引力強的人」。事隔咁耐，今日間小食店變成點就不得而知呀～

 

　　做Marketing有好多「工具」，但工具本身只係一個軀殼，能夠善用呢個工具嘅策略先係靈魂～

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票