2024-04-29
逆天奇案2 | 梁小冰感激老公寵愛31年:好似拯救我嘅白馬王子!歷父親弟弟離世看透人生
歌都有得唱「也許相愛很難...」,在人海茫茫裡遇到情人已經不易,能成為夫妻維繫感情到老更是要講緣份。54歲的梁小冰,與陳嘉輝由相識、相戀至結婚相處31年,老公對她照顧無微不至,令小冰無憂無慮活像童話故事中的公主一樣。長年來能夠甜蜜如昔,互相欣賞,每日有源源不絕的話題,他們找到了屬於兩人的相處方式,使夫妻感情持續保鮮。
梁小冰在《逆天奇案2》中飾演的阿蘭,一生坎坷,雖然遇到徐仁達(陳嘉輝飾)展開黃昏戀,但仍是波折重重。現實生活中的梁小冰相反,生活美滿,與陳嘉輝結婚31年,夫妻感情深厚。二人育有一子陳洋溢。一直以來,梁小冰無憂無慮,得到陳嘉輝體貼的照顧。
日前,梁小冰為劇集宣傳,她接受本網訪問,談到24年的婚姻生活,她被陳嘉輝寵愛得童話故事中的公主:「多謝陳生,我哋拍拖7年,佢帶我從地獄走上天堂,佢就好似騎住白馬嚟拯救我嘅白馬王子,我好感激佢,結婚24年,係好老公又係好爸爸。我唔可以一心二用,做嘢嗰陣就好專注,但一日入面佢可以做好多嘢,佢可以放工順手去街巿買餸返屋企,仲問我使唔使放入雪櫃。而我其實係啱啱起身,喺度敷面膜。湊仔返學、放學都係佢做,我只係負責煮餸,同埋煲劇。」
梁小冰感激老公的愛護,她形容陳嘉輝在家中同時有不同的角色。二人年紀相差6年,她畢業後已經在無綫工作,認識已入行的陳嘉輝,當時他有如大哥哥照料,在工作上不時提點自己:「有時會好似Daddy,當我係女咁錫。有時似男友,好Sweet,而家佢年紀大過六十,似我老爺,又似我爸爸老咗個樣,但嘉輝更加慈祥,有時我會跟阿仔一樣,嗌佢Daddy。」到現時仍然呵護備至,訪問當天梁小冰透露,原本陳嘉輝打算陪伴她做訪問,可是因有工作而未能同行,但答應會接放工。
在梁小冰眼中,陳嘉輝是好好先生之餘,亦是一個好爸爸:「佢真係好叻,阿仔啲功課都係佢負責,放工會去書局買補充練習畀個仔做。佢唔係乜都識,但為咗個仔,會做好多嘢。以前阿仔細個學琴,考到第5級要學樂理,有日阿仔喊住話唔識,鋼琴老師都教咗幾個月都唔掂。但臨近考試,我惟有向老公求救。佢都唔識,於是上網自學一星期後教個仔,阿仔又考得好叻。」陳嘉輝細心的程度極高,梁小冰指平時自己出入,老公會事先幫她安排路線圖去到目的地,她還說:「好似嗰日阿仔要去其他學校考中文,嘉輝事前一日去一次嗰間學校,佢會計好晒點樣去目的地,同埋要幾多時間,好穩陣。」
老夫老妻天天對著都不生厭,梁小冰自爆陳嘉輝會經常甜言蜜語讚美:「好似今日我捲住頭髮,佢會好大反應讚好靚,『靚咗又瘦咗,摸下條腰先,條腰得番22吋腰喎』。同埋我哋乜都傾,大家會雞啄唔斷。佢做演員之前係工程師,其實佢外冷內熱,同埋佢浪漫得嚟好攞命,攞咗你個心。當日我爸爸走咗,佢好急帶我去醫院,而且佢比我喊得咁快,我做女都係去到醫院先識喊。」
生活相處下,少不免有磨擦,二人爭執的機會卻很微,梁小冰表示陳嘉輝脾氣很好,從來沒有發洩不滿,她笑謂:「唔滿意只會冇表情坐埋一邊,就算我發脾氣佢都唔知乜事,所以我會寫低啲事情,畀佢知我有乜嘢不滿,佢就知道發生乜事,但佢只會簡單答你『好』、『收到』。如果我不斷鬧,其實佢唔會知我嬲乜,慢慢令我學識,有乜嘢唔好嬲,漸漸就淡忘。」
54歲的梁小冰,自言真能做到五十而知天命,懂得感恩有家人的愛護,亦學會了愛惜自己:「人生都係幾十年人,我經歷死亡,爸爸走咗,兩個細佬走埋,人生如夢一場。爸爸走嗰陣,佢從來冇去過旅行,我同自己講,唔好掛住做嘢,去旅行、吃喝玩樂,陪細路成長,錢唔係咁搵法,要愛自己同愛人。」而她近年找到愛自己的方法,去學畫畫來令自己開心,繪畫得來滿足感,令自己充滿信心,也充滿能量。
做了多年幸福「陳師奶」,梁小冰見兒子漸長大,自己可以尋回自己的樂趣,除了畫畫外,還便再返無綫拍劇,發揮自己的創作小宇宙。今次客串做《逆天奇案2》飾演人生坎坷的阿娟,她經歷被男友出賣、坐監的女人,出獄後要捱苦,搞到未老先衰。她表示相隔26年回巢演出,見到好多老朋友,兼且大過戲癮:「我鍾意睇懸疑、殺人、驚慄片,冇諗過嘅人物性格,但地球上可能都有呢啲人,我想演佢哋嘅心理狀態,有機會拍都幾好玩,相信幾大挑戰性。」
之前一直有《愛回家之開心速遞》的觀眾,都希望梁小冰加入劇組,飾演朱展的老婆(陳嘉輝飾)。梁小冰表示監製、導演並未有邀請加盟,但熱愛演戲的她,早已為朱展的太太設計了角色形象:「我都有喜劇細胞,我鍾意演處景劇。如果真係拍,可以話佢太太喺美國返嚟,講嘢、著衫都好有美國人style,朱太都係幸福可愛太太,性格好浪漫,又鍾意Shopping,鍾意著傘裙同朱展擦出一啲火花。如果觀眾想睇我,但又唔知點開聲,咁我見到監製,可能又可以試下講會唔會請我做。」聽到梁小冰開到聲,《愛回家》嘅監製可以考慮一下。
轉載自: 晴報
【你點睇】巴黎奧運正式閉幕,今屆你感到最深刻的地方是?► 立即投票