2024-04-30Photo: Instagram
楊洛婷名牌銀包離奇消失報警求助:有張好寶貴嘅相喺裏面!老公Tim@Dear Jane承諾包養呵番老婆
現年42歲嘅2003年港姐亞軍楊洛婷一向品牌活動嘅寵兒,日前佢擔任活動司儀之後就發現銀包唔見咗,錢銀冇咗不特止,所有證件都冇晒,令佢非常頭痕!
楊洛婷昨日喺IG分享同張敬軒出席活動嘅相片,但佢之後發現原來工作期間財物不翼而飛,楊洛婷坐喺車內拍片,post出多個IG Story表示:「今日真係有啲唔開心,噚日做咗全日event,咁返到屋企冇check自己手袋,咁今朝車小朋友返學嘅時候呢,就發現我個銀包同個Money Pouch唔見咗。咁其實噚日嗰10個鐘頭做嘢呢,我係冇睇過我個銀包,冇用過我個銀包,咁返到屋企當然都冇用啦,咁依家冇咗我啲身份證呀、credit card呀,同埋有張好寶貴嘅相喺裏面……我都唔知可以點」。
楊洛婷之後去到到達將軍澳警署報案,要拎籌等之餘,仲花兩到三小時錄口供。楊洛婷展示佢名牌銀包以及散紙包嘅款式同擺法,佢將兩樣嘢擺落一個袋仔再放手袋;而佢做司儀期間,將手袋放喺靠近台上嘅一張凳上。最後,楊洛婷無奈表示因為冇咗駕駛執照,post出港鐵車廂內嘅自拍,又指因為咁冇得揸車接載一對子女,留言話當時冇CCTV,呼籲大家如果執到,盡快通知佢。
楊洛婷post出whatsapp老公Tim(黃天翱)撒嬌嘅對話,講到自己冇現金都拎唔到錢,問老公可唔可以包養自己,Tim就爽快答應佢yes,成功令老婆開心番晒,認真「襟撈」。楊洛婷2014年與Dear Jane主音Tim結婚,月初有報道指他們以1,828萬連車位沽出持貨六年的西貢「風水屋」傲瀧,估計呢次出貨令蝕咗500萬元,睇嚟楊洛婷「流年」破財!
轉載自: 晴報
夏日中暑高風險!即睇中暑迷思+預防措施!► 立即了解