後生仔，你快樂嗎？

　　「你快樂嗎？」面對近日社會上嘅紛紛擾擾，呢個問題相信好多讀者同Jenny一樣已經唔識答。香港同新加坡經常畀人拎嚟比較，家下連開唔開心都可以鬥一番！今日城市大學就發表咗一個研究報告叫做為「青年人開心指數研究：香港及新加坡兩地比較」，事先聲明，調查係修例風波之前做落，結果發現香港後生仔當時已經唔太開心，開心指數得6.8分咋！比新加坡青年人嘅7.48分低。其實，Jenny對結果一啲都唔Surprise。

 

 

 

 後生仔冇樓好鬼愁!

 

　　講返少少背景先，話說香港城市大學社會行為科學系與HK We Care今年1月至6月進行咗呢個研究，團隊喺兩地各訪問超過1000名40歲以下嘅後生仔，收集咗共2304份有效問卷，仲另外同48人做焦點小組訪談。問卷調查主要探討年輕人嘅開心指數(10分為最高，1分為最低)，以及11個生活質素滿意程度。

 

　　唉！Sadly，香港青年11個不同範疇生活質素嘅滿意度，都低過新加坡，包括「政治及社會」、「經濟」、「房屋」等。當中，香港後生仔最不滿係咩？燈、櫈！無錯！又係住屋呀！「房屋狀況」一part，只得3.87分；跟住就係「政治及社會」得4.79分；「環境」就4.87分，全部FAIL！

 

　　負責調查嘅人文社會科學院署理院長黃成榮就同Jenny講，因為調查係修訂《逃犯條例》風波前做，所以顯示唔到近呢兩個月香港後生仔個開心指數，但佢就估呢兩個月，會比6月前所得分數更低。

 

　　咁點算好啊？黃教授！佢就同Jenny講，研究團隊都有啲建議嘅：好似房屋方面，香港可以仿效新加坡房屋政策，為香港年輕人提供新的選擇，減少佢地買樓嘅負擔咁話！Jenny夠知啦，但係到而家，政府都拎唔到咩實質措施去壓抑樓價、去解決上車難嘅問題，資助房屋供應就得啲啲咁多，租金又無管制......後生仔點會唔灰！

 

和平解決時機未過？

 

　　政治及社會方面，黃教授同研究團隊就話，當權者應不論政治取向，定期同年輕人對話溝通，咁先可以真正了解佢地對政治同社會嘅訴求，令人地感到自己嘅意見被重視。政府做得到當然最好，但小妹最怕係「意見接受，態度照舊」，加上而家政府同年輕人都已經冇晒互信，似乎要建立返唔容易。

 

　　講到近排修例風波，黃教授一於搬埋歷史經驗同社會學理論出嚟，佢話社會衝突嘅武力升級通常最後會導致傷亡，傷亡就會導致仇恨。所以而家武力升級前，雙方都應該懸崖勒馬，盡快展開對話。對於有人認為和平解決時機已過，黃教授就以北愛內戰為例，「北愛爾蘭當時係用機關槍、手榴彈，死咗3000人最後都可以和解。」所以佢唔認同時機已過，仲話歷史證明只要雙方肯對話，一樣可以化解仇恨。

 

　　對於近日的警民衝突，佢就希望任何人都唔應該有道德疏離感，即係為報復對方而忘記初衷、將道德倫理拋諸腦後。例如稍有良心、專業的警察應該識得只用合適武力，而非以武力報復示威者嘅挑釁行為。

 

　　Jenny真係希望唔好再見血喇！但而家和談真係有機？小妹睇唔透！

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票