L先生 可否阻你十八秒鐘 看看信

　　而家呢個時代，大家冇啲緊要事都唔會寫信，寫得信嘅都要有翻咁上下誠意、時間，仲有心機，封封都唔少嘢架！如果有人肯個個星期都寫信俾Jenny，Jenny一定會好感動啫！當然，追數信就不了～不了～

(設計圖片)

田少年年月月晚晚朝朝密密寄信

　　Jenny發現近排啲男士都特別愛寫信，連田家二少都加入寫信大軍，佢好有毅力㗎，堅持不懈，持之以恆咁寫信俾L先生。邊個係L先生？咪就係半個月都冇被人捕捉過，屬於「超稀有」級別嘅－－保安局局長李家超！田二少一直好想問呀L先生，因乜事7月21日元朗班白衣人出咗嚟打人咁耐，班警察可以影都冇個嘅？

　　睇睇先，田二少喺7月28日先寫咗封信俾L先生，不過唔知L先生係咪太忙，已讀不回啊！可憐田二少等L先生的回信等到望穿秋水。不過，田二少點會咁易死心，唔夠一星期，今日又再寫多一封，實行奪命追魂Call，Call到L先生應機為止！

抬頭望星空發夢仍然自信 等到遠處你為我寫那一封

　　不過，Jenny就懷疑田二少好似問錯人喎，呢啲咁「仔細」嘅問題，L先生作為高官，一時三刻點答到你呀？田少可以考慮寫信去問吓警隊「二哥」鄧炳強，又或者八鄉指揮官李漢民，佢地最清楚嘛！之但係，李漢民指揮官好似唔太慣睇錶嘅，希望佢唔好隔太耐先答到田少問題啦！

　　又或者警察員佐級協會主席林志偉可以幫到田二少？話曬佢都好鍾意寫信，單單一個7月就出咗八封公開信，平均一個星期寫兩封。相信就算林志偉答唔到田二少問題，兩位都不妨做個筆友吖！ 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票