深水埗區議會爆真．口水大戰 驚嚇度100%

　　近排各區區議會嘅民主派議員都想討論下有關修訂《逃犯條例》事項，可惜提嚟提去都傾唔到啲咩，中西區就否決咗撤回修例嘅動議，係大埔同沙田區，主席直接話埋唔批准動議納入議程。今日就到深水埗區議會傾啦，本來Jenny都以為都會其他區會情況一樣，點知有「驚起」(驚到彈起)……仲令小妹明白到慎選隊友嘅重要性！

 

 

 

真．口水大戰

 

　　今朝深水埗區議會開會果陣就有班市民走咗去示威，話「反暴力，反暴徒」，要求傾翻民生議題。不過佢地搞到要三次休會，最後一個議程都未討論到就腰斬咗個會啦。

 

　　而係會議暫停之後，有市民同區議員衝突，佢地唔單止有推撞，仲出現咗一場口水大戰，唔係得把口鬧來鬧去嗰啲「口水戰」呀，係玩真嗰種口水呀！Oh My God！

 

　　話說，民協嘅梁有方同一名操有濃烈鄉音廣東話嘅女示威者發生激烈爭吵，雙方仲要互吐口水呀！Oh！ No！No！No！真係好唔衛生呀！好玩唔玩，玩口水，仲細咩！

 

　　Jenny望到都嚇到呆咗，雖然區議會係貼地啲、區議員會街坊啲，不過Jenny都估唔到連鬧交都用啲咁街坊嘅方法呀！

 

一千零一個立法會議員 忍唔住笑

 

　　大媽就怒斥係梁有方吐口水先嘅，所以心生不憤，繼而怒吐口水還擊，Jenny睇唔清楚係邊個吐口水先，不過無論點都好，隨地吐痰散播細菌都係唔啱架，分分鐘要罰款$1500。大人細路、各黨各派都唔好學啊!

 

　　有市民就鬧啲立法會議員一個月收十幾萬，反而破壞市民生活。呢個時候，民協楊彧就心水清咁指出，在場嘅區議員當中，只得民記嘅鄭泳舜兼任立法會議員喎，連舜仔聽到都忍唔住大笑呀。各位Uncle Auntie下次不如做多啲功課先，鬧錯自己人好尷尬㗎嘛!

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票