今日又係講《逃犯條例》！呢排中聯辦頻頻發功，上星期先叫完班人大代表同埋政協去西環「開會」，保安局噚日仲公布埋打算直上大會恢復二讀喇！

商界有保留 政府頭都痕

　　大家都記得之前商界嘈到拆天，話怕會唔會因為追溯期，以前喺大陸做生意時嘅「疏通疏通」會變成今日被引渡返去嘅理由。政府雖然「從善如流」咁剔除咗9個罪項，再係咁解說，佢哋都仲係有啲保留，政府嗰時應該都幾頭痕！

　　不過唔使驚，阿爺喺大廳！自從中聯辦同港澳辦上個星期開金口之後，大家就受到感召，紛紛話撐喇！就好似嗰日喺中聯辦開完會出嚟嘅政協黃英豪話，之前自己都有啲嘢唔明，但係喺呢1個鐘頭45分鐘嘅會議入面「茅塞頓開」，要即到社區同市民解說添呀！

傾多幾次偈 田少S終會歸隊？

　　除咗佢之外，商界嘅代表、立法會金融服務界嘅張華峰（肥老闆）都喺噚晚出Post，原來局長噚日公布完直上大會之後，就去咗香港證券學會講解《逃犯條例》。肥老闆就話今次講座「令業界清楚掌握條例草案的內容，消除了不少誤解和大大減輕大家不必要的憂慮」，後面仲Hashtag「#支持早日通過逃犯條例添」！睇嚟經民聯已經第一時間歸隊啦！

　　而今日就輪到自由黨喇！事關Jenny收到個採訪通知，原來今日自由黨搞咗個答問大會，又係請咗保安局局長李家超去「解說」，睇嚟佢哋都準備好「茅塞頓開」喇！而最出名嘅「壞孩子」、實政圓桌田北辰今日就話對政府要將草案直上大會感到「詫異」，但係一講到投票取向就話「言之尚早」，唔通真係被前黨友葉劉批中，「姓田嗰啲都話歸隊」？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇