今日立法會又好唔得閒！事關朝早有成3個會同時開，包括工務小組委員會會議、《2019年吸煙(公眾衞生)(修訂)條例草案》委員會會議（即係禁止電子煙個法案委員會），同埋《國歌條例草案》委員會會議，淨係電子煙同埋國歌法都已經撞到砰砰聲啦！

流一流無所謂？但….

　　Jenny聽聞，本身《國歌法》個會原定聽日（18日）已經要開4個鐘頭會，但係法案委員會主席廖長江又再喺今朝加開多兩個鐘。梗係啦！未搞掂《逃犯條例》，先快手搞掂個《國歌法》都好呀！不過民主派對咁樣嘅安排當然好唔滿意啦，議員就得一對腳，會就有3個，如果同時入咗呢3個委員會，都唔知去邊個會好！一個會唔夠人點算好？民主派就梗係出返舊橋──點人數，仲要係同時點添！

　　有聽過立法會會議嘅人都知，點人數等人埋位嗰段時間好悶㗎嘛！其中《國歌法》嗰邊，阿副主席張國鈞同主席廖長江就坐喺會議室都等大家入嚟，點知兩人個咪都冇熄，結果大家就聽到張國鈞向廖長江「進言」，話：「國歌法開唔成，佢地（泛民）今朝咁樣扯住（點人數），想國歌法唔開、流會。」廖長江就施施然咁話：「佢流一流《國歌法》我都無咩所謂嘅，等啲人警惕下囉，但『西環』實係『拆天』！」嘩嘩嘩！「西環」即係咩先？你懂的！

Ann姐都試過！「攬攬爸爸」夠經典

　　冇熄咪呢家嘢，廖長江都唔係第一個中伏嘅建制派啦！Jenny仲記得上年311補選嘅時候，代表建制派出選嘅民建聯鄭泳舜去報名參選同見記者嗰陣，身邊嘅蔣麗芸（Ann姐）就細細聲溫提佢「攬攬爸爸」、「呢啲嘢要做㗎！」又係因為冇熄咪，透過直播通晒天！搞到舜仔被人套咗個「裙腳仔」名號喇！你話熄咪係幾咁重要吖！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情