呢排立法會修訂《逃犯條例》嘅法案委員會風波日日新鮮，Jenny噚日整咗個Timeline幫大家「追劇」之外，小妹當然都要長駐立法會Mon住事態發展啦。而家法案委員會就「鬧雙胞」，兩邊各執一詞，劇情即將進入高潮位。呢個時候，Jenny順道同大家披露下各人「片酬」啦！原來最大權嘅人，唔一定最高薪㗎！

 

 

登！登！佢就係陳維安喇！

陳維安神隱一日終蒲頭

 

　　噚日就講到由內會指引做主持嘅經民聯石禮謙取消咗原定喺4點半舉行嘅會議，改去星期六朝早9點進行，但係民主派就唔同意取消，仲自行按原定時間開會，並將下次會議時間同樣定為星期六朝早9點。到時就有戲睇喇！

 

　　除咗同建制派抗衡，民主派亦都喺噚日搵過立法會秘書處陳維安要求會面同埋向佢發律師信，質疑秘書處濫用權力，或觸犯「公職人員行為失當」，不過佢哋去陳維安嘅辦公室等咗佢45分鐘都唔見人，公民黨郭榮鏗直情嬲到話「呢個係咩工作態度？」添！

 

　　神隱咗一日嘅陳維安喺今日終於蒲頭！佢朝早就事件見記者，話係因為收到民主派嘅律師信，所以要同法律部門商討，所以見唔到冇預約嘅議員喎！至於其他有關噚日會議嘅事，佢就用一句「秘書處已作書面解釋」答晒，跟住「嗖」一聲閃人。估都估到民主派就梗係唔滿意佢嘅答覆啦！

 

秘書長兩個月人工夠打工仔畀首期喇！

 

　　嗱！大家睇劇，有時都會關心下「片酬」啦！咁啱立法會有個委員會就討論緊議員薪酬，公民黨譚文豪就「順便」追問埋陳維安嘅月薪。唔問猶至可，一問！原來立法會秘書長嘅月薪而家已經高達26萬啦噃！係26萬呀！

 

　　留意返，而家立法會議員月薪都係9.8萬左右；兼任行政會議成員嘅議員就係6.57萬，再加行會嘅8.3萬，即月薪約係15萬；而立法會主席嘅人工約等於一名普通立法會議員嘅兩倍，即係19.7萬。即係話立法會秘書長嘅人工，比起立法會主席梁君彥仲高一大截！

 

　　Jenny細細個就聽過：「職稱唔係重點，人工幾多先最重要！」果然係真理！大家千祈！真係！唔好！睇少「秘書」呢份工呀！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情