親！係時候交稅啦喂！

　　「….but in this world nothing can be said to be certain, except death and taxes（唯死亡與納稅無可避免）」－－Benjamin Franklin（富蘭克林）。係呀！令到一眾打工仔頭都痕埋嘅「綠色炸彈」又嚟喇！稅務局已經向一眾納稅人發出稅單，而大家就要喺一個月內（即係6月3號之前）交報稅表啦！不過如果你用電子報稅就可以有多一個月時間！

稅收創歷史新高

　　稅務局就話，2018／19年度整體稅收臨時數字都有成3414億，係創咗歷史新高㗎！比去上期增加咗4%。其中利得稅、物業稅、個人入息課稅同埋博彩稅都同樣創新高，利得稅收入更加係增加咗兩成添！點解加咗咁多？稅務局局長黃權輝就覺得係因為同上年香港經濟表現不錯，令到部分行業利潤增加有關喎！

自願醫保下年先有得扣稅

　　不過，稅收創新高都唔係Jenny最關心嘅事，Jenny最關心都係自己要交幾多血汗錢畀政府！嗱，Jenny記得今年財爺先喺發表《財政預算案》嘅時候講過，寬減75%嘅薪俸稅同埋個人入息課稅，但係個上限就縮咗水，由最多寬減3萬蚊減到去2萬蚊，所以交得多稅嘅朋友仔就有可能有影響喇！

　　至於上個月開始嘅自願醫保計劃，其中之一嘅賣點就係有得扣稅。不過由於係今年先實施，所以要去到下一個課稅年度（2019／20年度）嘅暫繳稅入面先會扣減，今年係未有㗎！大家要留意喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票