修訂《逃犯條例》拗咗咁耐，政府仲話會「從善如流」消除商界嘅憂慮，所以剔除埋9項同商業有關嘅罪行。不過，今日有「大劉」之稱嘅華人置業前主席劉鑾雄就決定「企出嚟」，唔係撐政府啊，原來話要就住今次修例提出司法覆核（JR）噃！

真．大劉聲明

「長洲覆核王」都要企一邊！

　　小妹喺呢行打滾多年，JR就成日都見，關於政治案嘅JR就更加唔使講，之但係多數都係「長洲覆核王」郭卓堅提出，今次大劉搶咗郭生個位，Jenny啲朋友都食住花生咁講話：「正呀喂！郭卓堅都唔使搞，今次有大劉出手！」

　　事關今日正值4月1日愚人節，廣大嘅網民加埋行家起初都唔係好信，直至見埋佢份入稟狀，大家先知佢係講堅、認真㗎！梗係啦，大劉2014年嗰陣，因行賄澳門前運輸工務司司長歐文龍及清洗黑錢罪成，被澳門法院被判咗要坐5年零3個月，如果修例通過咗，佢都幾有可能要引渡去澳門服刑，到時真係港九新界冇得避吖！

原來大劉想「追溯力」OUT

　　好多網民都對今次修例有意見，雖然一方面好想將台灣殺人案嘅疑兇繩之於法，但係一方面又擔心日後被「尋釁滋事」引渡返大陸，所以今次有大劉出面，唔少人都留言力撐。之不過，唔知大家有冇睇到大劉份入稟狀，其實佢係要求修例唔應該有追溯力，任何喺修訂生效前被定罪嘅人，都唔應該被移交到與港府無引渡協議嘅地區。即係話你要修例冇所謂，唔好搞到我就得喇。而且冇咗追溯期，仲點解決台灣單殺人案？大家都係唔好捉錯大劉嘅用神喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇