港鐵撞車罰錢又如何？羊毛出在羊身上咋！

　　港鐵一衰再衰，由上年衰到今年都仲未完，前排仲炒埋車，搞到荃灣線中環站至金鐘站列車服務足足暫停兩日。唔好話Jenny由出世到而家都從未見過，連車務總監劉天成都話，係港鐵自1979年通車以來第一次發生呢類型事件咋！家下撞車要罰錢，但又如何？大家諗真啲，其實都係羊毛出在羊身上咋！

 

 

 

罰到去上限 都係2500萬

 

　　之前有講法就係，港鐵就算訊號故障，都會盡量維持有限度服務，因為個機制淨係會計算延誤時間最長嗰班車同正常行車時間嘅差別，所以就算全日只得有限度服務，只要佢隔一段時間有郁下，咁就唔使罰咁甘。不過今次直情係服務暫停咗兩日，所以就要罰到去上限金額喇！

 

　　不過，大家都唔使咁快請小鳳姐住！事關個上限都只係2500萬，對比起港鐵每年近百億嘅盈餘，呢啲罰款可以話只係「面嗰浸」咋！加上所謂嘅「罰錢」，其實都只係按票價調整機制入面嘅「服務表現安排」，撥2500萬出嚟「回饋乘客」，即係咩？即係好有可能只係下年加價嗰時，唔加或者加少啲。對管理層有乜影響？Sorry！冇囉！

 

　　嗱！港鐵今年又加價喇！仲要加成3.3%，真係「要加價，加到盡！」Jenny覺得，咁做等同懲罰緊一眾乘客啊！

 

優惠又喺假期咁湊巧？ 劉天成食咗誠實豆沙包

 

　　你認為港鐵淨係得呢啲招數？Jenny只能講一句「少年，你太年輕了」，今日港鐵都公布埋因應事故而推岀大約半價嘅車票優惠補償，今次仲會一連推出三日添！日期係5月11日（星期六）、12日（星期日）同埋13日（星期一），當你以為終於有日上班日可以享受到平飛，Sorry！你諗多咗喇！事關5月13日係佛誕翌日，即係都係公眾假期呀！想拎呢個「補償」嘅朋友，呢幾日就唔好留喺屋企休息喇！

 

　　港鐵都唔係第一次喺假期先嚟推出補償優惠喇！今日就有行家問到港鐵點解係平日出事，卻又唔肯平日補償。劉天成竟然好似食咗誠實豆沙包咁話，因為星期一系統多人用，根據風險評估，所以都係決定假期推行。

 

港鐵厚顏 市民受難

 

　　Jenny聽到真係忍唔住為港鐵如此厚顏「拍手」，唔知係誠實豆沙包威力強勁吖，定係港鐵已經係有恃無恐喇！港鐵主席馬時亨之後仲話希望市民可以明白港鐵嘅苦衷，明明受害者係市民，馬生咁樣講一講，唔知仲以為市民蝦佢添呀！馬主席，你又有冇諗過廣大市民嘅苦衷呀？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇