公司聖誕Online Party？高科技抽獎，老闆齊齊黑箱作業

　　聖誕節踩哂星期六、日，連埋補假嘅星期一、二連放四日，放完假真係差啲捱唔住，起唔到身返工！不過呢幾日大家應該出席咗大大小小唔同團體嘅聖誕Party，活動環節一定唔少得抽獎同交換禮物啦！今年公司有冇待薄你地，拎啲垃圾出黎畀大家抽呢？本人公司今年破！天！荒！安排咗個令人畢生難忘嘅聖誕Party畀我地歎！睇下究竟一間公司度縮起上黎可以有幾縮啦！

　　話說，本人公司除左有幾層用作辦公室之外，仲有一層掉空用作公司活動之用。而一直以來的聖誕節傳統，公司都會係該層安排到會、進行現場抽獎等等的Party活動。今年，公司突然從沉睡中醒來，深明作為一間牟利機構，實在唔可以浪費任何賺錢的機會。所以早在年中，已經將該層「員工的後花園」租借給其他公司牟利。咦，咁今年咪冇聖誕Party囉？公司緊係知你班薯仔諗咩啦！為咗安撫一眾薯仔員工，聖誕Party照搞，但就比人地行先一步，公司同我地開左個Online Party！

　　「Online Party」呢個名，一聽就知道有前瞻性，真係大膽且創新嘅提議！Party由22號12點半開始，公司上下一眾員工如果想參加Party及抽獎，就要先Like公司facebook page，再一直睇住一班高層及嘉賓live。是次Party除咗有幸睇到平時「 3點不露」嘅高層自high之外，仲可以欣賞佢地享受美食嘅英姿，情況如同睇住韓國「吃播」一樣，餓住肚睇佢地食野折磨觀眾。 

　　另外，參興Online Party嘅同事更可以看到嘉賓魔術師係鏡頭前表演令人驚豔嘅精彩魔術，魔術師每次將水啊、火啊之類的素材「發」向鏡頭，坐在電腦前看live的我都差點「辣親」，真是驚險無比啊！到咗全日高潮位，當然係抽獎環節啦！一個大大的盒失驚無神從鏡頭左方出現，高層們拉高手袖以示公正，再將「肉手」放下抽出30位得獎者的Staff ID。

　　下午3時，Online Party完結。獎，聽聞畀一班「Ger級」以上及「清潔姐姐級」以下的同事抽哂。究竟中層及小薯係咪真係咁冇抽獎運，定係存在於失驚無神出現的大盒中的抽獎卷，根本就沒有我們的存在。呢個迷團，只有安排Online Party的「未來人」先知。什麼到會、零食等等，公司一樣有order，只係大家再不能以「螞蟻搬家」方式，將零食走水貨至私人櫃桶，反而要「眼甘甘」隔住個mon，望住高層大快朵頤。同時，我相信，公司安排是次Online Party，係要同事「完咗party你直接坐係位到繼續做野啦！」認真，呢個Party令我諗起某年中化試題「網上拜祭服務」…我緊係有咁誠心得咁誠心拜祭電腦中的「先人」！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好