【OL心理戰！】只准我一人獨瘦，不准其他人齊齊苗條

　　瘦身係女人嘅終生工作！每當電子磅數字稍有波幅，都足以令女人們嗌生嗌死，刺激指數相當於老闆玩緊幾千萬股票！近日，公司就有位女同事瘦身成功，正當人人好奇佢瘦身的秘密之時，佢就將成功之路保密、唔益其他女同事，成為聖誕前夕「八婆熱門話題」。

 

　　有減過肥嘅姐妹都知道，減肥同搵男朋友一樣，真係人夾人！有人食藥搞得掂；有人減肥藥當飯食都搞唔掂！有人節食2星期瘦到幾個碼；有人呼吸都會肥！要搵到一個真正有效嘅減肥方法，真係唯有化身白老鼠，親身去試下。所以，當我地見到身邊同事能夠瘦身成功，緊係好奇佢用左咩方法，睇下可唔可以都幫到自己啦！ 

 

 

　　「嘩！Winnie，你做乜瘦左咁多啊？」 

 

　　「冇囉！真係冇！好多人都咁講，但個磅都冇變過！」 

 

　　「但係你啲手手腳腳好明顯幼左好多喎！」 

 

　　「個磅真係冇變！可能之前水腫呀！你知女仔好易水腫架啦！」 

 

　　「你係咪有睇開中醫？佢話你之前係水腫呀？腫到咁誇張？咩事啊？」 

 

　　「係呀！佢話我好腫，可能而家退咗啲，但真係冇瘦到。同埋我睇中醫都係調理身體，令你整體健康好啲咋，冇減肥成分架！」 

 

 

　　減肥小隊多番挑戰Winnie，但Winnie都係唔肯分享自己減肥成功的秘訣，只係對外透露自己只不過係水腫。慢慢，減肥小隊由虛心請教，變成一班羨慕又妒忌嘅八卦女人！ 

 

　　「問極都唔肯講做左咩，我就唔信佢之前真係水腫喇！」 

 

　　「點會係水腫啊！一眼睇得出佢係肥啦！佢啲肉係結實嗰種，點會水腫唔！唔肯講就唔肯講啦！」 

 

　　「仲要講到自己好似本身就係咁瘦，只係水腫先漲左成個碼。係呀，咁我一起身就係咁嘅樣，我從來唔化妝添架！擺明就想收埋減肥方法，唔比其他人都瘦威脅到佢啦！」 

 

 

　　事情發展好簡單，一眾女性都係枱底不停控訴佢扮哂野（包括我）！雖然，理性上知道佢嘅減肥方法未必適用於我嘅體質，但感情上大家都好嬲佢竟然將減肥武器隱藏，唔分享畀大家！佢嘅做法正正就係讀書時代識得神秘避過turnitin審查，但唔教大家一樣咁自私！所以，奉勸各位OL，有好野千祈唔好諗住隱瞞，因為職場是非會慢慢將你變成你自己都估唔到咁衰嘅衰人！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票