【斷絕親子關係】因為雞脾而引起的家庭糾紛……

 

　　上星期講到，上司一家大細好似摩西分紅海咁嚟到Canteen，又咁啱走到同事面前停底，準備同同事搭訕。

 

　　「嗌叔叔同姨姨吖。」 禮多人不怪，同事急不及待指令仔仔向上司夫婦問好。點知懷疑係稱呼上講錯嘢，上司老婆似乎面有難色。 

 

　　「Hello Simon，帶埋仔仔嚟玩啊？」 

 

　　「哈哈，係啊，撲唔到飛，唯有兩個人嚟玩啦。」 

 

　　「小朋友，你叫乜名，幾多歲啊？」上司轉攻小朋友 

 

　　「我6歲。」(手指擺住6的手勢) 「就升小學喇喎？你想讀邊間小學？」上司老婆突然插咀問小朋友。

 

　　小朋友唔識答，然後攬住同事。 

 

　　「哎呀！唔可以咁架！學下哥哥（手放在仔仔頭上），見多啲野、大膽啲，先讀到好學校、先做到有用嘅人架！淨係識得匿喺爸爸後面，無用架！」 

 

　　「哈哈，知道架啦！係呢，你小朋友都肚餓啦，不如你哋去坐先，我幫你哋買完拎過去畀你啦！」同事即為小朋友解圍。

 

 

　　「麻煩友一家」唔使自己買嘢食，梗係一口答應，然後施施然搵位坐低。而同事及我，就叨咗上司光可以直接打尖買嘢食。係等緊嘢食嗰時，同事小朋友突然同同事講咗：「爸爸，我唔鍾意頭先個姨姨。」冇計啦小朋友，你爸爸為咗兩餐，仲要做埋侍應幫佢地點餐、送餐。

 

　　呢個時候，第二個問題出來了。本身接受咗食熱狗的仔仔，見到「麻煩友一家」點嘅雞脾餐，緊係立即拎住死都唔放手。同事多番解釋雞脾係人哋嘅，但年幼嘅仔仔只有左耳入右耳出。同事為免要上司久等，而且心情都有啲煩燥，就答應轉買高級版的雞脾餐畀仔仔，但就要求小朋友親手把雞脾拿給「麻煩友一家」。就係呢個要求，小朋友被迫同爸爸做侍應，向麻煩一家低頭送餐。而上司一家人，包括上司仔仔，都保持著嗰個黑人憎又高高在上的表情。試問一個只有6歲的小朋友要將心愛嘅雞脾雙手奉上畀個討厭嘅人係幾咁難受？相信只有6年人間經歷嘅佢應該未接受到社會擦鞋之道。送餐完畢後，小朋友對住個夢寐以求嘅雞脾餐，唔止食唔落，甚至向同事扭計……

 

　　「我唔鍾意幫佢哋買嘢！點解佢可以食雞脾，你唔畀我食雞脾！點解媽咪唔可以嚟！我要搵媽咪！」

 

　　唔使講，小朋友雞脾都唔食一支箭咁跑走咗，而同事唯有雞脾都唔理追出去啦。講到尾，大人之間嘅社會禮儀應唔應該沿用在下一輩身上，做大人嘅應該考慮一下。當然，戴定頭盔，每個家長都有自己的教育方法，只要自己做完唔後悔就可以了。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇