每次睇見梁特首舐嘢，我都覺得，真係學到好多嘢。睇佢點樣將語言偽術揮灑自如（雖然大家都會睇得穿），睇佢身邊嘅人點樣無限任兜（但係肯兜嘅人愈嚟愈少），係一個好令人享受嘅過程。

 

　　今次梁家響應滅鼠專員梁美芬嘅倡議，合演《反斗赤鱲角》呢套黑色幽默大片，上星期出完聲明，好多建制派都封口冇表態，唯獨仍然有唔少「忠心友」好肯掂呢淌渾水，包括啱啱上任行會嘅民建聯葉國謙，佢嘅一番修例建議真係回味萬千、嗒落有味，仲臭過榴槤。然後就到全世界最想選特首嘅前保安局局長、行會立會雙料議員葉劉淑儀，用佢一貫「冇乜嘢呀，唔係好特別啫」嘅態度，話航空公司係會為VIP咁樣做，亦強調阿媽係女人嘅道理，表示可以幫梁特首拎入去，係因為「香港係得一個特首咋嘛！」由一個想選特首嘅人支持特首有特權，真係好有說服力。

 

　　這類神邏輯，即係正常人唔會明嘅邏輯，係永遠唔會停止出現。觀乎上篇文章嘅留言，更加精彩。由開頭話特首件事唔出奇，經常都係咁，有留言人士去到後期，興奮到明言在此事上特首絕對應獲特事特辦，梁特首看到留言板有這麼多死忠，究竟笑好定嬲好呢？明明想spin冇用到特權，但係輿論戰士擁護自己有特權喎！好，就決定忍唔住笑啦！

 

　　最令我感動嘅係，面對多個空勤職員工會，表達多年來均需一視同仁，由旅客親自做安檢取行李的聲明，我先知道原來香港政府係咁團結，保安局、機管局、民航處都話事件符合一直以來的保安守則，從政策層面走出「有香港特色的機場保安」，梁特一家先破後立，厲害厲害。

 

　　但我覺得機場前線員工真係好唔識做，咁樣都唔識得變通，唔識從善如流，竟然仲係鐵板一塊，堅守那套塵封了的國際標準。多個傳媒親身示範，全部機場前線喺事發後，都繼續表明唔會幫旅客帶行李，明顯要企硬抗拒機管局。亦有網媒打畀多間航空公司查詢，香港航空有提及，由前線職員決定是否代領行李，但係要遇上特別情況，咁要有幾「特別」呢？冇講到。香港快運就叫人問返相關同事。

 

　　值得留意嘅係，因為梁頌昕事件而凸顯機場保安漏洞致令他們面臨國際航空公司排名可能再跌風險的國泰航空（簡稱「昕航」），發言人表明無論係咩情況都唔會代領行李，旅客必須親自離開禁區取行李，說法未有任何動搖。咁問題嘅關鍵就係，昕航當晚點解轉軚，頌昕嘅爸爸明明咁仁慈、把聲咁敦厚，冇理由嚇窒個職員嘅，一定係個職員見到頌昕成廿幾歲人，都仲咁楚楚可憐，心生同情，決定為佢做跑腿，理得你特首定凸口，日行一善身體好！

 

　　有趣嘅係，梁特首噚日開行會前見記者講嘅一句說話，「由保安人員和航空公司人員決定，並非頌昕或者我去決定」。喂呀！！！做乜咁快自爆啫，你咁樣咪解開咗謎題囉！呢句嘢睇落乜都冇講過，但係作為業餘專業語言偽術分析師，佢個意思好好好大可能就係「嗱，我同個職員講咗啲咩唔重要，重要嘅係佢哋最後都決定咗幫我囡囡，我作為頌昕嘅爸爸，唔關我事喎！」係喎，人哋淆底，真係唔係因為你係特首喎，係人哋個膽太細咋嘛。個結論就係，頌昕行李風波係「健康問題」，咁有請高永文局長為大家解釋一下點去解決今次事件。

 

　　可以將一件小事化大，冇返咁上下歷練，唔容易辦得到，有人話係生果報搞事，咁係咪全部人都只係睇一份人民日報，個世界就會好美好，梁氏一家就可以開開心心過日子，行李直飛世界任何一處？消息人士引述立法會主席曾鈺成，在民建聯路向營當中說的一句，最能點題「件事係小題大做，但係如果冇小題，又點能夠俾人大做呢？」

 

　　跟完矛盾去完旅行嘅曾主席修行足夠，道出呢件事嘅核心。梁特首任內好多件小事加埋一齊，剩係家庭問題都已經夠寫小說，香港人雖然出名善忘，但係當你一件件疊加上去，就會有加乘效應，即使係一件小事，因為切合「有權用盡」嘅人物性格，即使係聽電話嗰個，都好可能感受到重重壓力，呢一步就係特權被濫用，重要唔係用喺自己身上，而係本身只係普通人嘅女兒。

 

　　但我要承認一件事，其實一路睇，觀察到反梁勢力存在住一種心態，就係「我得唔到嘅嘢，你都唔可以得到」（詳情可以搵返黃子華2003年棟篤笑《冇炭用》提出嘅「魚蛋理論」），我真心希望大家調整心態，我哋目標係要消除呢種「特權心態」，咁樣所有階層嘅人先可以謹守專業，唔係睇人面口，聽人嘅施壓聲去遷就、冇原則咁過活。

 

　　而我亦都期望挺梁人士繼續兜，好鍾意鑑賞你哋啲邏輯，多得你哋一路潑火，香港人先至會記得，你哋所擁護嘅人，有幾咁不堪。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇