政府有一種職位，叫做「新聞主任」，即係每個部門的傳訊事務總管，亦即係PR。官至政策局的新聞主任，就成為局長的「文膽」，局長的公開發言、局方新聞稿等等事宜都要處理。現屆政府強硬作風，弄得民怨四起，但都有幾個局不在風眼中，環境局、食物及衞生局，這些局長的PR都過到些好日子。但人總是愛有挑戰性的工作，我幻想，如果我係教育局局長吳克儉的新聞主任，我相信每一日都一定學到好多嘢，而且每日都過得好豐富......

　

　　如果我老細係吳克儉，我會每日都驚心動魄。

　

　　儉儉局長上星期六出席一所中學畢業校慶活動後，佢搭車離開，被學生、校友及教師包圍請願，要求佢落車接信。儉儉挾住「負民望」負得最勁嘅紀錄，自覺官威甚巨、意氣風發、盤腳而坐、不動如山、「玩 (挽)、玩 (換) 手機」（留意返，局長在第二日解話時，佢係講呢個四字詞語形容傳媒點樣指控佢當時做緊嘅嘢），45分鐘先安然無落車，無接信，無少一條頭髮咁離開。

　　

　

　　當日下晝，佢出席另一個活動時，講咗一番講稿冇嘅說話，「我覺得佢哋 (教育局同僚)  做咗好多好好嘅嘢，點解一句說話就話香港教育制度唔好，就將佢哋抹煞晒？我係好唔順氣嘅！」的確，作為新聞主任，嗰一下其實都冇乜嘢可以做，唔通上台搶你咪咩，老細？但係聽你講完，背脊真係一浸浸涼氣。此言論觸發教育界更大的怒火，認為局方不單對過去半個學年多位學生先後輕生後知後覺、未有正面對策，反而冇謙卑反思政府可能就係為社會增添絕望感，最後換來吳克儉呢句稿外之音。

　　　

　　局長講啲唔係稿裡面嘅嘢，其實已經唔係第一次，所以局長都心知肚明，講咗句「我嘅同事好擔心我會講啲稿以外嘅嘢」，喂老細，都見慣世面啦。回想返兩年半前，2013年9月，你有一次話自己同副局長楊潤雄「分道揚鑣」去視察開學，但據聞呢一段說話本身都係寫好咗嘅稿，但就唔係寫「分道揚鑣」，而你事後都認咗，原本係想講「兵分兩路」。寫好咗嘅稿，都可以講錯到離行離列，難道仲可以期望你講其他嘢會冇事？

　

　　如果我老細係吳克儉，我會每日都帶計數機。

　

　　因為我要話俾老細聽，五千蚊分俾學校應對學生輕生問題，個效果同「五餅二魚」係差唔多，但分「五餅二魚」嗰個係耶穌，佢行緊神績，而你只係一個鍾意每個月睇三十本書，活喺一個學童返屋企「零家課」嘅世界嘅一位堅‧離地人士，You can fly everyday！但係五千蚊連一套日本來回商務機票都買唔到啦！老細，你真心覺得有用嗎？

　

　　讀者可能會話，喂，做又鬧唔做又鬧，想點呀？其實如果真係未諗到做啲咩好嘅話，真係可以暫時HOLD住先。而家話派五千蚊俾每間學校，係話俾大家知，政府希望短期內用錢暫緩自殺問題，而呢筆錢係得咁多，唔要就罷。除咗涼薄，仲可以點樣幫老細spin？

　

　　如果我老細係吳克儉，我會每日都係雙面人。

　

　　根據now新聞台節目《政情》透露，有商科大學生組織舉辦活動，原定邀約吳克儉作嘉賓，但經過上星期針對他的示威後，該組織向教育局表示取消相關安排。突然變卦，他們只是回應指想邀請返商界背景的人，加上已邀請其他政府代表出席，可以等下次先請吳克儉，但沒有回應為何當初又請佢。呢啲場合又的確可免則免，否則新聞主任聽到老細講嘢，又可能會被影到一個「黎日正」嘅樣，咁就唔係咁好啦。

　

　　2015年9月，梁特首接受訪問時為佢老死中聯辦主任張曉明的「特首超然論」解畫，表明「特首地位的確好超然」，當時站在他身旁，時任特首辦助理處長、負責傳媒聯絡工作的黎日正「打咗個突」，露出驚訝表情，被傳媒拍下。

 

　　黎日正在今年初調任港府駐日內瓦海外辦事處，相信佢嘅面部表情都輕鬆返晒。

　

　

　　羅列咗咁多嘢出嚟，可能有人會話，唔克勤嘅吳克儉日日爆seed，製造咗一場場「關公災難」，真係辛苦晒一眾新聞主任落力諗計拆彈，睇吓點幫局長造返好公關，我就覺得，其實真係完全唔關呢班公關事架啦，係真真正正關呀關公事，關公係正義嘅化身，吳局長完全係同關公「分道揚鑣」、背道而馳、與民為敵，你哋有咩就搵關公對付佢啦，唔好搵我哋呢班公關啦。

　

　　如果我是吳克儉的新聞主任，到最後，我會每日心如止水，期望老細喺明年可以光榮退休，風光大...退，又或者最好就盡快落台，好好過兩袖清風嘅美好日子，又可以順返條氣，挑戰一日讀一百本書嘅世界紀錄，我仲計劃開個網俾佢，叫「每本一篇」，每本書寫返一篇閱讀報告，俾香城嘅莘莘學子知道自己做緊嘅「每日一篇」同埋讀書報告係幾咁膚淺，仲有，到時每個月俾返五千蚊吳前局長當獎勵同鼓勵，買包零食呀乖，唔好嬲豬啦喎！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情