要救一個癮君子，可以幫佢安排戒毒療程，等佢逐步緩解，可以靠不停嗌口號「take嘢，衰硬」，嘗試令佢受感化，當然仲有其他方法，但如果個癮君子發作，叫你「呀.....好辛苦呀.....俾啲丸仔我食呀.....好辛苦呀呀呀!!!!」你會唔會睬佢呢？答案都好明顯。

 

　　咁如果要救一個上咗毒癮嘅行業，而佢又要求俾佢食原本減緊量嘅毒品，仲話想比以前食得更加多，大家又覺得理唔理佢好呢？而我所講行業，就正正係香港嘅旅遊業。

 

　　旅遊業界上星期瘋傳一個短訊，署名係香港旅行社東主協會會長葉慶寧發出，內容提到佢同梁特首會面，提到業界希望恢復深圳戶籍居民來港一簽多行措施，而梁特首就落咗個條件，話如果香港民間有共識，唔會再做「踢篋」呢啲行為，就會向中央爭取恢復一簽多行，以及開放更多自由行城市。

 

　　訊息一出，旅遊業界如獲至寶，輿論立即指向有本土派團體於五一勞動節喺上水再搞反水貨示威，如果當日再有踢篋行為，佢哋就有彈藥指控示威者。但後來幾經查問，原來係協會主席林少麟聽完葉慶寧引述會面內容之後，自己揣摩，再自己代葉慶寧打呢個訊息出嚟，但摩錯隔離，將啲字面意思搞混，葉慶寧其後澄清，指出會面其間梁特首話如果再有對旅客不禮貌行為，開放更多自由行城市亦冇意思。成個意思調轉咗。而林少麟就強調，個訊息只係業界朋友之間轉發，唔明點解會去到傳媒度。

 

　　朋友？潑得出去就預咗引起討論啦。我認為恐怖嘅係，訊息傳開後業界嘅反應，好多人似乎都好歡迎恢復一簽多行嘅倡議，同上咗癮真係冇乜分別。而到今日，仍然會聽到業界嘅人怪責有人踢篋，但係點解冇人怪責零團費同強迫購物，仲要越嚟越多人跟埋一齊做呢？邊樣趕客啲，大家心知肚明。

 

　　真實數據出埋嚟，更加冇得呃人，如果真係好似業界部分人咁講，香港人對大陸客咁不禮貌，今年勞動節假期客量理應下跌，但根據入境處數字，三日勞動節假期，合共47.3萬大陸客人次訪港，比舊年再升7％，最重要嘅係旅行團數量反而下跌，每日約一百團，業界估計比往年少四成至五成。

 

　　我好少讚大陸人，但係今次都真係要讚一讚佢哋，因為終於開始醒目。呢個正正就係多年嚟香港旅遊業界吸自由行鴉片煙慢性自殺嘅後果。每一日無數嘅大陸客被一車車咁車去珠寶店、首飾舖被劏，好似屠房啲牛咁。如果踢篋係不禮貌，難道閂埋鐵閘迫人買嘢係好禮貌？言猶在耳，早兩日大陸網媒又報導一單強迫購物，而咁多年嚟由導遊阿珍開始，到舊年導遊打死人，一件件事件揭發出嚟，業界部分人有冇反省過呢？

 

　　多年以嚟，自由行鴉片煙養到呢班人肥肥白白，亦令香港旅遊業淪為減值行業，只要你夠無恥，肯毫無底線咁迫人買嘢，你就可以喺大陸客荷包賺到盡，或者咁講，佢哋帶緊嘅一團團，都唔係人，而係提款機，嘩咁真係好尊重啲大陸人喎。

 

　　總之最短時間賺晒佢哋嘅錢就係鐵律，當部提款機唔work，咪打到佢肯嘔錢出嚟囉，好正常啫。咩深度遊，咩綠色旅遊，咩小店？食得架？最好就全條街開晒藥房、金舖，唔係點賺錢呀？

 

　　呢種諗法，就係最毒嘅地方。因為一依賴咗，個行業就唔識進步，連帶原本受益嘅零售業，都唔係好返到轉頭。是時候戒毒了，希望，真係希望唔會太遲......

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好