西九無底洞工程超支，政府在立法會財委會闖關，遇上泛民主派拉布頑抗，霸佔主席台、拉鋸一刻鐘、轉場地續議在二、三月的財會成了指定動作。建制派指責泛民粗暴霸佔主席台阻延會議，泛民反指建制派議會暴力強搶民脂民膏填氹，誓要令高鐵停工止蝕。建制派則再反擊，多次祭出旗號，指大多數民意支持高鐵超支撥款通過，但正如建制派發言時也同意，很多人只是含淚支持。

　　拉鋸多時，到上星期五，財委會加開會議，代主席陳鑑林「感覺到」時機到了，撥款再拖，高鐵會輸，是時候剪布了！使出招數，只允許新晉公民黨議員楊岳橋向官員發問七分鐘，之後隨即進入處理議員臨時動議的階段，引來楊岳橋用大聲公抗議，陳鑑林運用權力趕楊岳橋出議事廳，泛民議員集體離席阻止保安帶走楊岳橋時，「薑是老的辣啊」，陳鑑林立即視泛民此舉為放棄提出臨時動議，隨即宣布表決撥款申請，由於冇人提出要記名表決，一班建制派議員開心舉手，制都唔使按。

　　Treegun、麗芸等人贊成又舉，反對又舉，最終陳鑑林愉快地宣佈通過表決，理得你議事廳一片混亂。事後傳媒逐幅相點名，搵返有十幾位建制派議員雙重舉手，有部分更加係陳鑑林問誰人反對時才舉手，過咗海就係神仙嘅鑑林代主席鍾意講Feeling，話「憑感覺」點人數就OK。大主席曾鈺成亦力撐同黨做法。

　　相比起兩年前處理新界東北撥款時搞到一鑊泡嘅暗星吳亮星，陳鑑林作為老油條不慍不火，完全將議事規則玩弄於股掌之中。就好似落場踢波，球證話係乜就係乜，你話：「喂！有晒片為證架喎！球波擺明未入晒龍門線，只係掂到條邊，唔應該計入。」但球證話：「我憑感覺嗰下見到就係咁，判咗入冇得上訴！」冇錯呀，你係球證你大晒，但係球迷們會記住你呢一下，當你再做球證嗰時實柴你台囉。

　　講得出憑感覺，證明佢已經覺得唔需要同大家交代，即使可能面對司法覆核挑戰，但是政府只求盡快拿到巨額款項延續工程，任何問題都毋須交代，迎來人治的時代，立法會仲傾咩議案？落街feel吓民怨有幾大咪得囉！

　　「憑感覺」，潛台詞係「唔需要講證據，我對眼就係證據」。冇禁掣紀錄，憑感覺就知議員係投贊成；冇民意調查，憑感覺就知多人支持繼續起高鐵呢個黑洞；冇人笑？憑感覺都知I CAN FLY ONE DAY呢個爛gag好笑啦！你仲唔笑？

　　如果講感覺就可以解決問題，蓋過爭議的話，咁有唔少人心入面嘅感覺，應該會係，CY, can you go away one day?

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好