博客都好耐都未聽過有人話炒手機股，主要係手機技術發展進入瓶頸期，機種機款無太大進步，消費者亦無太大誘因去換機升級；而手機目前都係換下鏡頭、換下螢幕，就話出新一代，最叻都係出咩「三摺疊」，但都係好睇唔好用。

　　呢幾日就有消息出，據內媒報道，為了符合內地數碼產品購新補貼，蘋果將旗下多款手機降至6000元人民幣以內，例如iPhone16 Plus128G版本由6999元降至5999元，此前僅一款iPhone16 128G售價5999元人民幣符合補貼要求，料一定程度上利好蘋果銷量。

　　鴻騰精密(06088)今日似乎真係有資金流入炒起，博客不禁要問：政策真係幫到手機業？

　　博客認為，而家手機業，就好似當年NOKIA咁，出好多款、好多樣，但功能上無太大進步，當有「智能手機」出現，NOKIA未意識到就已經差唔多失去市場。所以內地補貼有幾大幫助，博客覺得作用輕微，更何況內地經濟唔太好，手機由7000蚊降到6000蚊，咁換機之後仲使唔使食飯？

　　又試幻想下，其實好多科技公司開始進入「量子時代」，會唔會有公司真係做到「量子手機」呢？如果以量子角度去思考，鴻騰精密又或者有小小機會呢！點都好，今日鴻騰見高位，有貨好食，無貨就觀望OK了。

《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》青少年自殺率上升，如何分辨求助訊號？社工分享陪伴的重要性► 即睇