唔知點解，博客睇到福壽園(01448)呢隻股炒起，突然個腦響起BGM: 輪迴派息的人不買不能，徘徊炒起的股份……

　　正所謂「生人都要破地獄，生人都好多地獄」。今時今日香港地，股民都依然仲係地獄入面，以為升上20000點就有起色，點知又跌落萬八點關口，可能「祖師爺」唔中意恒指升到咁高，都無辦法啦。

　　咁就唯有睇福壽園啦，福壽園公布，將於本月24日舉行董事會會議，藉以考慮向公司股東宣派特別股息建議。

　　呢個時候仲有特息派已經好叻，畢竟所謂「死人生意」一路都好穩陣，經濟周期係點、股樓升定跌，殯儀需求都唔會點變。雖然呢兩年股價由高位跌剩一半，但佢個低位3.3一路都硬，兩次都跌唔穿，相信3字頭買入防守姓好高。

　　其實福壽園一路都有進步，好似「子華神」咁，殯儀都搞出個新花款，2020年正式推出「福壽雲」平台，推動「互聯網+殯葬服務」，開發雲訃告、雲追思、雲上紀念、數字禮葬、數字紀念館、福壽家禮、福壽雲管家；2022年8月，更推出「數字陵園（上海）慧心谷」項目，另創新研發了「記號、紀念、記載」融於一體的「3JI」創新迭代產品，搭建上海福壽園VR環境體系，完成數字人技術落地等。

　　如果計防守性，福壽園防守力唔錯，如果有現金的話，而家入場都還可以。如果之前輸落太多想轉下場，都可以考慮。

　　眼淚唔好滴係輸錢舊股身上，舊股會唔捨得；搵到錢嘅股份，先係最重要。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【etnet 30周年】多重慶祝活動一浪接一浪，好禮連環賞！ ► 即睇詳情