《經濟不停學》世界商品期貨千奇百趣，原來呢種都有得Trade？

　　講起商品期貨，大家應該都有聽過下咩係黃金、大豆等等。不過，最初設立期貨嘅原意，並唔係鼓勵人好似賭錢咁賭，而係畀人做風險對沖！而且，期貨嘅世界比我哋想像更廣闊無邊，當中仲有好多種類係我哋諗都諗唔到，相當騎呢！今日就同大家介紹有咩新奇百趣期貨啦！

 

(Shutterstock圖片)

 

乜嘢係期貨？

 

(Shutterstock圖片)

 

　　期貨嘅英文叫Futures，代表「未來交易嘅契約」，每張期貨所對應嘅指定產品叫「標的物」。係起源於早期嘅農產品交易市場，為咗避免之後嘅貨品價格大幅波動，影響買方嘅成本或者導致賣方大幅虧損，於是雙方就預先簽訂合約，決定好買賣數量、價格同交割日期。到咗交割日，無論邊個賺蝕，佢咃都無得反口。

　　舉個例子，幾百年前已有人怕稻米來年收成唔好，所以買家預先同米商預先簽訂下年嘅訂貨合約，等買家可以優先拎到米。買賣雙方都要根據合約上面嘅價錢同數量成交，是但一方毀約嘅就要賠錢。

　　時而世易，因為交易體系成熟咗、我哋嘅生活習慣變化大咗，「標的物」嘅種類亦愈嚟愈多。

維Ｃ防疫－橙汁期貨

 

(Shutterstock圖片)

 

　　原來為咗生存落去，人類真係可以去得好盡！今年頭各地嘅新型肺炎爆得好勁，為咗吸收多啲維他命Ｃ，有人狂買橙汁，但偏偏嗰陣運輸成本大咗，居然令本來波動性已經好大嘅橙汁期貨喺第一季急升近23巴仙。不過，其實期貨Trade嘅係冷凍濃縮橙汁，係咪真係可以發揮到維他命C嘅功效成疑，所以不如食多幾個生果，或者沖檸檬水飲下好過啦！

港女至愛－芝士期貨

 

(Shutterstock圖片)

 

　　一絲絲嘅拉絲芝士，放入口腔中嘅油潤同彈性口感，簡直置身天堂。芝加哥商品交易所喺2010年推出芝士期貨，係用40磅重嘅塊狀芝士，同500磅重嘅桶裝車打芝士嚟計價。不過佢哋用途有分別，一塊塊嘅囉嚟造「天然」產品，例如切片，切絲或者大塊嘅芝士，我哋喺超市見到嘅就係呢類。

　　至於桶裝就用嚟做「加工」產品，例如點粟米片嘅芝士醬咁。因為近幾年啲人注重多咗健康，食少咗加工食品，加埋要用芝士嘅意大利同墨西哥菜愈嚟愈受歡迎，搞到兩樣嘢嘅價差愈來愈大。於是芝商所今年新推咗淨係用塊狀車打芝士嚟計價嘅期貨，而家兩樣都有得Trade㗎。

救救地球－碳排放期貨

 

(Shutterstock圖片)

 

　　愛護地球理應係全人類嘅共識，當然有相關嘅產品推出，多個國家有份簽署嘅《京都議定書》喺2005年正式修訂，一啲發達國家被限制國內溫室氣體排放，呢啲國家會獲分碳排放配額，再分畀國內嘅企業。

　　為咗鼓勵減排成本低嘅企業超額減排，透過交易機制下，呢啲公司可以將剩低嘅碳配額轉賣畀其他減排成本高嘅企業幫佢哋實現減排目標。而相關交易仲會變相推動廠商去開發、投資碳排放減量嘅技術，更加環保之餘仲可以創造綠色商機添。

    事實上除咗上述三個，仲有牛油、貨運路線、玻璃等等嘅商品期貨，佢哋嘅出現多數都同生產成本有關，相信隨社會發展，缸友喺未來會見到更多得意嘅理財產品，到時不妨主動留意，搵下有冇吸金良機啦！

 

撰文：吳藹林

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票