《經濟不停學》金、金礦股、金ETF知多Ｄ

　　地球真係好危險！世界各地周圍都係火頭，除咗英國同歐盟未搞惦脫歐，中國同美國又搞緊意識形態鬥爭、同印度又爆發衝突。除咗命仔安全之外，都要確保自己荷包安穩！所以自古以嚟，黃金就係公認嘅避險資產，打仗都係靠佢保命！今日就介紹下三種黃金投資產品，佢哋玩法唔同，所涉及嘅風險亦唔一樣。

 

（Shutterstock圖片)

現貨金玩高槓桿，財來財去平常事

 

（Shutterstock圖片)

　　我哋聽到嘅現貨金，一般都係指國際現貨黃金或者本地倫敦金，係一種現貨黃金買賣合約，對應標的物係成色至少99﹒5巴仙嘅黃金，一般唔會涉及實物交收。

　　每張合約以每手100盎司為單位，每次最少可買賣0﹒1手。因為多數涉及以孖展形式進行高槓桿投資，所以佢係三種黃金投資產品入邊風險最高嘅。不過佢有啲特色係其他投資產品好難取代，例如因為喺倫敦、紐約、香江等全球黃金孖屐交易時間有唔同，投資者可以喺交易日內trade足24小時，而且係T+0交易，資金流轉幾乎無限制。而交易形式係雙向交易，買升買跌都可以，總之無論個市飆高定潛水，都有機會賺錢，但要小心係槓桿效應下，金價輕微波動都可能損失全部本金。

　　至於我哋成日聽到嘅倫敦金騙案，多數係指受害人被誘簽署授權書委託騙徒代為投資，騙徒於是狂做交易，靠佣金食埋受害人份本，缸友記住要帶眼識人呀！不過，現貨金係最反映到股市風險嘅，通常國際政治出現爭端、股市有下跌現象、貨幣出現貶值等，大家都會瘋狂搶金，並導致現貨金價格急升，所以現貨金係某啲情況屬於一種避險產品啦！

金ETE收埋管理費，價啱要沽冇息派

 

（Shutterstock圖片)

　　除咗現貨金，香港都仲有好多同黃金有關嘅投資產品嘅，好似同黃金掛勾嘅ETF啦！而本港流通量較高嘅金ETF，有SPDR金ETF（02840）同價值黃金（03081），每當投資者買入ETF，基金就會買入相應價值嘅實金作儲備。

　　睇返資料，SPDR金ETF嘅資產淨值，係參考倫敦金銀市場協會下午黃金價格作定價。而ETF追蹤金價會有一定偏離度，偏離度越細，代表越貼近基準，截至今年8月底，SPDR金ETF過往一年跟蹤偏離度係－0.0324巴仙，都已經好貼近啦！

　　要留意嘅係，金ETF除咗做trade果時有聯交所同劵商要收嘅交易徵費之外，仲有基金管理人本身要收恒常管理費，都係每年0.4巴仙左右，而呢兩隻ETF都唔會派息，意味缸友如果要有賺，係必需透過直接買賣佢嘅股份。金ETF嘅波幅未必有現貨金咁勁，不過相對地投資者唔使拎實金周圍走，亦唔使面對槓桿嘅風險，適合一啲相對地保守嘅投資者！

金礦股也靠運，業務組合睇真啲

（Shutterstock圖片)

　　有人鍾意買金，又有人鍾意投資「金主」，講緊嘅就梗係開發貴金屬嘅上市公司啦！目前係市場上較大隻嘅金礦股有紫金（02899）、招金（01818）、山東黃金（01787）同中國黃金國際（02099）等等。

　　不過，佢哋同現貨金、金ＥＴＦ嘅最大分別係業務唔單止得採集同銷售黃金、做嘅生意可能仲有銅、銀、鐵同鉛等等。換言之，影響佢哋股價同業績嘅因素係唔止得金價走勢，另外仲有開採成本、金礦含金量等，投資者唔可以淨係睇住金價做人，仲要考慮埋管理層因素，例如會唔會派息、集團未來發展方向、有冇突然間配股等等。

　　用山東黃金（01787）嚟做比喻，截至今年６月底止中期業績，集團收入有330.4億銀人仔，其中嚟自銷售金錠、黃金相關產品和其他嘅收入有329.93億人仔，即係佔整體收入99.86％，而紫金係61﹒28％、中國黃金33﹒7％，所以理論上，山東黃金嘅股價比起其他兩隻金礦股，係跟得金價最貼嘅。

　　另一方面，喺6月17號，山東黃金公布被其中一個股東折讓最多7﹒7巴仙配股，佢當日嘅股價就最多碌低過近5﹒5巴仙，所以玩金股隨咗要識睇金價走勢之外、都要講少少運氣。入場費方面，上面提到嘅金股同金ＥＴＦ之中，價值黃金、招金同中國黃金國際一手入場費都低過5000銀，其中中國黃金國際仲千幾銀有交易，而紫金入場費最高，要過萬。缸友自己睇住荷包嚟入啦！

 

撰文：吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇