《MakeMoney》虛擬貨幣點投資？新手懶人包話你知！

　　唔少人對於虛擬貨幣都趨之若鶩，不過技術門檻又好似好高，一時又挖礦、一時又電子錢包咁，都唔知邊樣打邊樣，唔使怕，呢個專欄就係幫新人們入場，雖然虛擬貨幣投資門檻同需求知識係高小小，但又唔係代表要電腦高手先做到嘅，《MakeMoney》就同大家講下新手想入場虛擬貨幣要做好咩預備啦！

 

 

網上平台Trade：要識咩叫C2C！

 

 （Shutterstock圖片）

 

　　由於香港未有一個正式平台係面向散戶，所以唔少人都會選擇使用外國平台進行交易，其中幣安（binance）就係一個較為受香港散戶歡迎嘅平台，皆因出金入金快，手續費又唔太貴。

 

　　過往香港散戶都習慣用信用卡直接係幣安平台買幣，雖然會有小小溢價，但勝在即買即用，簡單快捷。不過，有唔少投資者發現，近來香港各大銀行所發出嘅信用卡，都無法係幣安平台上過戶，雖然信用卡平台就無明文解釋原因，但估計就同近期內地封殺加密市場有關，估計香港都跟隨動作。

 

　　不過，又唔係無辦法係平台交易嘅，其實幣安平台上有有好多「C2C」交易，情況就類似找換店咁，不過就由公司或者個人經營。首先你係C2C平台向一啲商譽較好嘅平台落單，所謂「較好」即交易成功率高嘅店，進行落單後就係銀行過戶金額，完成後就通知找換店，當佢地見到你過數，通常15分鐘內都可以轉帳畀你。

 

　　留意返，由於銀行需要遵守有關反洗黑錢嘅法規，所以假如交易過密或者金額過大，銀行就會懷疑你進行洗黑錢。因此儘量就唔好用出糧戶口進行交收啦！建議散戶用虛擬銀行；假如銀行真係要你解釋點解有咁多資金流出入，有投資者表示，其實可以向銀行表示自己係進行緊虛擬貨幣交易，並提供交易證據，只要證明道自己唔係進行洗黑錢活動就得啦！

 

電子錢包點樣開

 

 （Shutterstock圖片）

 

　　有人可能覺得放係交易平台唔安心，因為怕黑客入侵，所以都會想開返個電子錢包旁身。開電子錢包確實唔難，雖然幣安自己本身都有電子錢包服務，不過市面上較多人用就係Coinbase電子錢包同Metamask電子錢包（俗稱狐狸仔錢包），只要跟住佢個開戶指引就可以簡單完成。

 

　　不過，電子錢包又唔同過往開戶模式，因為電子錢包係放棄使用「用戶帳戶/輸入密碼」呢種方式，皆因黑客好容易估計到你個帳戶同密碼；所以電子錢包通常都係使用「記生字」嘅方法，即係你開戶之後，電子錢包就會話你知一組12個助記詞(seed phrase) 嘅排序，而呢個12個英文生字就等你嘅帳戶號碼兼密碼，每一次完整登出之後，你都要順次序咁再輸入呢12個英文生字先可以登入。

 

　　呢種方式係較難遭到黑客破解，因為12個英文生字排序可以有無數個組合，但用戶就要「用自己嘅方法」去記低呢組英文生字同排序，皆因官方係無辦法幫你搵返呢組數字出嚟，假如你自己無記低，而入面又有資產，咁就等同掉入鹹水海啦！另外，呢組生字其實係屬於「獨立」數字，可以應用到任何一個品牌嘅電子錢包，即你係A品牌開咗個電子錢包，拎左一組12個生字，輸入去B牌子嘅錢包，都可以一樣應用到。　　

 

　　而你個錢包每進行一次交易，資料都會Pack上區塊鏈，畀世界上任何一個人睇到，所以有大戶操作，只要一Click區塊鏈就知道邊個係幾時進行大手買入或者沽出。當然，呢個錢包係人地眼中，都係一串無意義嘅數字同英文組合，無人知道你真正身分，亦都無辦法從你錢包拎走任何錢幣。

 

交易有分「合約」類型，要了解清楚避免嚇餐死！

 

 （Shutterstock圖片）

 

　　由於從錢包轉入轉出，數據係需要Pack上區塊鏈，而Pack上去呢個動作，就係由「礦工」完成，完成後就必須要礦工支付運費，俗稱「燃料費」（Gas Fee）。所以大家要清楚兩件事：第一，自己嘅電子錢包係支援邊一款智能合約；第二，錢包要預留燃料費向礦工支付。

 

　　市面上常見嘅智能合約包括用幣安技術基礎嘅幣安鏈（BEP2）、使用以太坊作為基礎（ERC20），以及使用Tron作為基礎（TRC20）。好似近來大熱嘅狗狗幣（Dogecoin）及柴犬幣（Shiba Inu Coin）咁，就係使用ERC20模式嘅合約，從幣安轉到錢包嘅時候，就要選擇返適合你錢包嘅合約（主網類型），否則就會出現無法顯示嘅情況！到時真係嚇餐死！

 

　　好似Coinbase錢包本身並不支持（BEP2），假如你將你嘅柴犬幣用（BEP2）模式轉過去的話，Coinbase錢包係無法適認，所以係唔會顯示出任何過戶信息；而Metamask電子錢包就分別接受（BEP2）及（ERC20），所以用狐狸仔錢包就兩者通殺，只要將一組12個助記詞(seed phrase) 輸入返狐狸仔錢包，就可以顯示出來，咁就可以安安全全啦！

 

撰文：李皆穎

 

 

 

 

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇