2021-12-07Photo: 圖片由作者提供
一齊吶喊:倒轉地球!!!
2021最爆藝人,上半年,當然是Mirror及Error。咁,最後一季呢?
當紅的Error 成員也要抄,即係……
人人會極度興奮話你知:陶大宇!
陶大宇,年青當紅時,分別做過TVB及ATV戲劇組男一,絕對師奶殺手!
年青時,大宇賣靚仔斯文,乃「師奶殺手」。
不過,隨著年紀漸大,又冇勁爆新劇,人氣自然慢慢消沉。不過,爛船總有三根釘,挾著昔日名氣,仍可在內地接大量商演,叫價五萬至十萬人仔,都幾好搵。
近期大宇商演身價由五萬急升至三十萬人仔!
本來,這類藝人,在所謂知識分子圈或扮野文化圈,都不會一顧,認為「卡士」不同也。
但是,近日突然有學者,包括社會學家及心理學家,甚至研究政治的,都蜂擁加入研究「陶大宇現象」。正因佢一首走晒音,聲嘶力竭,被譽為「宇宙級唱腔」的《倒轉地球》,俾人拍咗掟上抖音,即時紅遍國內,尤其大灣區。然後,倒流回香港,再折射到全世界有華人的地方。
自此,就不是一個藝人的騎呢低檔演出hit中市場咁簡單,而是變成一種「社會現象」!
對,陶大宇的走音老土忘我歌喉加上水撥式舞姿,間中又再蛤乸跳,的確充滿娛樂性。但是,為乜會勁到一飛沖天去咁誇張呢?
陶大宇的蛤乸跳及抹窗舞姿,竟然狂受歡迎。
這個,真要連結埋政治及社會氣氛來解讀。
過去兩年發生的種種,香港人,真的有「心口被巨石壓」感覺,有說不出的沉重。有點想嗌又不能嗌,甚至嗌也再無力的沮喪感。
過去兩年的社會運動及疫情,令香港變成「悲情城市」,人人恍似心頭被重壓。
再加上疫情,人人惶恐,人人擔心,個個跌到了人生的空前低點。整個社會,陷入集體抑鬱。其實,大家都好想放聲大嗌大哭大叫。當然,最好加埋大笑。起碼,可以短暫治癒點點無奈又挫敗的感覺。
正在此時,陶大宇的《倒轉地球》突然橫空而出,毫無預告。但一睇就會令你無限興奮,不能自拔地一睇再睇,幻想自己就在商演現場齊齊大笑大叫齊齊走音大唱,忘情忘我。
這種感覺,香港人迷失太太太太久了。能夠重拾,真正非常正,喜悅由內心湧出!
或許,今天的處世態度,最佳就似陶大宇,唔理客觀環境係點,只非常投入去演繹自己,話之你笑我騎呢至死。大宇心態正能量到極,不單唔嬲,仲非常enjoy大家攞佢嚟玩。
感謝陶大宇,感謝短暫釋放香港人的抑鬱及壓力。各位,一齊深呼吸,來來來,大齊吶喊:來吧倒轉地球!!!
大宇的《倒轉地球》正好給香港人一個放聲狂喊機會。大家皆代入孟克的《吶喊》?
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】有健身中心宣布全線暫時結業,議員指巨額預繳式長約並不合理,你日後若「入會」會更留意邊方面?► 立即投票