2020-09-17
【公司文化】爭取還是推卸?從員工面對挑戰的反應,檢視管理層管治方式
一份好有挑戰性嘅工作,有人視為艱難,亦有人會視為挑戰。視艱難嘅人,好怕面對呢項挑戰帶來嘅不穏定性同後果,所以一定係「A字肩」然後推畀其他同事做。視為挑戰嘅人,會覺得係一個難得嘅機會,好想參與其中,更想自己一人獨領,唔畀「機會」其他同事。當然你可以話係因人而異,但其實員工對不同挑戰嘅反應,好多時都反映出公司管理層嘅管治方式,成功與否亦有迹可尋。
Joey剛剛加入咗一間大企業內工作,公司每一個project都極具挑戰,Joey同好多應徵者一樣,都因為呢啲「機會」加入該公司。但事實係,公司九成員工都好害怕呢啲所謂嘅挑戰,原因唔係佢哋做唔到,而係公司有一個唔容許失敗嘅老細,所以同事們都害怕挑戰失敗所帶來嘅後果。最後公司所有員工包括Joey,由最初滿腔熱血,到最後所有project都係為做而做,就算能力再高嘅同事,都係但求做到,不求做好。每當晚上11點後收到上司們嘅電話,Joey會因太大壓力而手震同失眠。久而久之,冇人願意承擔,老細要求就更變本加厲,同事就更避,形成一個惡性嘅雪球。最後每個員工嘅夢想唔係升職加人工,而係盡快轉工。
其實大部分舊式嘅亞洲傳統教育,多數習慣以責罵、責罰作為基礎,如果小朋友擇選並非既定答案時,就會被視為錯誤,以責罵「糾正」佢哋。而歐美教育就多以鼓勵、讚賞為基礎,同亞洲人有點相反。呢個傳統同公司文化有點類似,外國公司較為勇於創新,較多以創意為主嘅產業同產品,所以外國公司多會以技術/開發部門為佢哋嘅「主部門」,希望創新產品能夠產出更大嘅利潤,Apple、Airbnb等等嘅公司就係一個好好嘅例子。而亞洲公司則多以Sales為主部門,除咗主要希望為生意賺錢跑數外,對公司嚟講亦係最簡單直接嘅賺錢「方程式」,係最安全到達目的地嘅方法,可以減少大錯誤嘅出現。
其實有好多公司嘅管理層只係口講「鼓勵同事創新」,但實行時就以「責罵」作管理嘅出發點,由「管理」變成「迫你」。搵工除咗要了解公司外在嘅一面,亦要了解佢哋面對挑戰時員工嘅反應。員工嘅性格特質,就正正係公司嘅本體。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【與拍賣官看藝術】常玉作品屢創天價,背後其實藏著跌宕起伏的人生► 即睇