【員工價值】MT Programme係光環？謙虛表現精英特質，光環自然來

　　參加過大公司MT programme嘅畢業生，因為被大公司所選中，再經過兩、三年磨練，自覺變成公司精英中嘅精英，所以好多時都會被賦予一個無形嘅光環。

　　Toby係今屆MT programme畢業生，過去兩年入過三個部門，跟過四位上司，做過好多不同嘅projects。Programme完結前三星期，人事部開始為各MT安排部門。Toby嘅心情同中學選科派位時一樣，既驚且喜，但Toby對自己進入心儀部門信心十足，而最後選揀咗 Event Marketing 部門作為佢嘅目的地。

　　一星期後，人事部通知Toby成功獲派Event Marketing部門，職位係coordinator。本來expect自己會同其他MT 同事一樣獲得officer / senior officer 嘅職位，所以佢對今次「降級」十分差意。人事部解釋，因為過去兩年佢喺Event Team 工作日子尚短，未有特別經驗，成績一般，大學所讀學科亦無關，可以話係近乎零經驗，如果一入組就擁有senior職級，對組內officer 同工作三年嘅senior officer十分不公平。但部門主管欣賞Toby嘅工作態度同潛質， 所以決定俾Toby一個機會，亦承諾三個月後review時會再考慮升職。經多次理論後Toby仍覺委屈，一時氣結下向部門主管出言不遜，言語間更帶點不尊重，打破部門主管對佢嘅印象，最後亦因為咁而放棄呢位MT，由另一位補上。

　　MT programme係一種特別又令人羨慕嘅制度，「精英班」嘅感覺令人不其然給予自己一個神聖光環，但其實programme過後，現實歸現實，公司 / 部門唔會因為你自封嘅光環而特別善待你，完成MT programme後被炒嘅個案亦常見。同樣情況，有啲之前喺大機構空降落嚟嘅高層，都會不期然地自封光環，以精英嘅姿態表現出其高人一等嘅地位。

　　其實就算你係哈佛畢業、二十年經驗、有100樣技能都好，永遠只有你去融入呢個社會，社會唔會融入你。別人可以給予你光環，但光環千萬不能自封。不論你係MT 精英、高層同事還是係老細，工作時都應放下光環，當自己係一個普通員工，堅持自己個人價值嘅同時，亦謙虛地表現自己作為精英嘅一面，成為一個別人值得尊重嘅老細，或者係一個受別人認同嘅同事。

　　事實係，唔會因為你有光環，先令你能力高人一等；而係因為你能力高人一等，先令你有光環。記緊，不論你工作幾耐，小薯定old seafood，高層定微塵，返工除咗要學做事，亦要學做人。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】東南亞藝術市場是下一個熱點？一探各地獨特及吸引之處！► 即睇