【好工難求】揀「穩陣工」3大要點：公司多皇親國戚屬大忌！

　　香港打工仔搵工唔難，但要搵份好工就好難，有朋友十年內喺6間公司工作過，當中4間公司都係倒閉而被逼裁員。據統計，有80至90%嘅初創公司會喺開業一年後倒閉，而剩下嘅10至20%當中，大半公司都唔能夠捱過五年。所以打工仔除咗要搵好工，亦要搵到「穩陣工」。

 

週轉愈來愈慢

 

　　有時生意差未必係重點，週轉不靈先係致命傷。所有老細創業嘅時候，對守業有相當嘅準備，當公司營運一段時間後，經歷過高低潮，對守業亦有一定技術。所以一時間生意差，唔代表一定會倒閉；相反，生意好都可能會突然執笠。唔難見到有啲公司年年賺錢，但都會突然倒閉，主要原因係現金或流動資產不足，又或者資產同負債比例失衡，導致破產繼而倒閉，俗稱「黑字破產」。早年有統計，大部分公司倒閉嘅原因都係同現金流有關，而週轉不靈嘅第一個先兆就係數期嘅變化。

 

　　每個行業都有自己嘅數期，不同嘅產品生命、銷售周期、公司規模大小、營運模式等，都直接影響數期長短，所以重點應該係公司數期嘅變化。有啲公司數期十分飄忽，時長時短，好可能係公司營運模式雜亂無章，做生意同踩鋼綫無異。如果發現公司數期漸漸拖長，並無重回正軌嘅趨勢，金額亦越來越大，收帳又愈來愈慢，就要加倍小心。

 

愈來愈多皇親國戚

 

　　做生意係一件好理性嘅事情，但如果老細或高層不停聘請親朋戚友，難免會將公司變成感性主導嘅地方。請「自己人」時，雙方好多時都係基於「幫下手」，老細諗住幫細佬搵份工，而細佬就諗住幫阿哥輕輕打理一下公司，從未必諗過全心全力，雙方期望有落差就係一個開端。另外，皇親國戚嘅職位多數唔低，人工亦會畀市價為高，但能力就未必勝任，最後除咗愈幫愈忙，浪費公司人工，同時影響其他同事，拉低士氣。所以如果愈來愈多皇親國戚加入，而公司又冇咁多人力財力去浪費的話，就只會慢慢步向倒閉嘅局面。

 

人才離開

 

　　能幹同事離開，最直接係影響工作進度，但其實呢啲都係其次。因為工作終有一日會完成，而新同事亦有可能比上一位更好，所以佢哋離開嘅原因先係重點。做得嘢嘅同事離開，往往都唔係佢哋自願，好多時都係被逼走。講得出逼走，離開時嘅結局都係不愉快，主要問題係公司管理上出咗亂子，令能幹者或賢臣一個一個離開，而呢啲問題嘅根源，係連老細都唔能夠，甚至唔想去改變，而唔能夠、唔想改變先係挽留唔到同事真正原因，變成公司倒閉嘅源頭。

 

　　同拍拖一樣，你揀人時，人亦揀你，當你發覺對方慢慢變質，唔能夠改變時，離開可能係最好嘅解決方法。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇