1個失業者的自白：迷失在Comfort Zone

　　我叫Benson，35歲。

 

　　我喺呢間公司做咗5年，我會話我而家係處於一個comfort zone入面，雖然我而家一啲都稱唔上comfortable。而家嘅我非常安於現狀。

 

　　我承認，唔想變，因為我懶。

 

　　5年前搵工嗰時，我update過一次CV，同開咗一個LinkedIn account。自此之後，呢兩樣嘢我都再冇掂過。兩年前有個舊同事想介紹我去佢間新公司，但我都婉拒咗，因為我一諗起要練習面試嘅自我介紹，同睇新公司嘅website、「溫書」，我就已經唔想apply。

 

　　我亦承認，唔想變，因為我害怕改變。

 

　　我習慣咗朝早8點09分先趕頭趕命咁出門口，趕上同一班地鐵，衝入同一個車廂門口。喺車上日日都見住同一班熟口熟面嘅陌生人，打機嘅打機、煲劇嘅煲劇、畫眼線嘅繼續畫眼線。我亦習慣咗同7仔阿姐每日買早餐時嘅兩三句交流，雖然無謂，但最少所有嘢都係我預期之內。人愈大，愈接受唔到轉變，對未知之數愈感不安，所以我盡可能減少轉變嘅發生。我希望繼續將自己困喺呢個comfort zone入面。

 

　　呢一刻嘅我，喺工作上唔會偷懶，但亦唔會出盡全力。咁辛苦、咁上心，搏乜？頭兩年喺呢間公司，我都試過出盡力，搏上位，但咁又點？最尾咪又只係升咗半個grade，做緊而家呢個Deputy Assistant Marketing Manager位。到而家老細要升人，計年資，我上面仲有兩個老屎怱頂住，論勤力，我又唔夠廿零歲嗰幾個嚟。我寧願安安穩穩，等佢每年自動加我2%人工算。唔夠我發達，但夠畀家用，又餓我唔死。

 

　　正當我處於呢個無慾無求、處之泰然嘅狀況下，上星期Director話我哋部門會cut一半人，而我係其中之一。我對呢個消息冇咩大反應，因為一時之間，我諗唔到下一步要點做。原來就算我想繼續留喺我嘅comfort zone，現實環境有時都會將我逼出嚟。Comfort zone其實不存在實際邊界、定義，因為佢只係一個我唔想面對現實嘅心態。簡單啲講，我只係自我感覺良好。呢一刻，我冇任何準備就要離開comfort zone。我究竟要點樣再搵工？下一份工我究竟適唔適應到？我好似已經再冇能力去判斷。

 

 

　　嗰日，我四點半就返到屋企。一入門口，阿媽問我：「做咩咁早返到嘅？」

 

　　我冇答佢，一支箭咁「標」入自己房。衫都未換，我就開著部Switch，開始打Monhunt。呢個係我另一個comfort zone。如是者，我就喺呢個comfort zone裏面又過咗5年。

 

　　今年，我40歲。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票