2022-12-14
職場女王Son姐 | 工作界的失樂園:60K洗碗工無人做!政府工唔使大學畢業頂薪50K!請人難係邊個嘅錯?
寫完上一篇稿,正想疊埋心水修練葵花寶典,希望我的餐廳能夠早點緣份到能夠請到有緣人。結果被我的可愛讀者們的留言,搞到我笑到收唔到聲幾乎走火入魔。獨樂樂不如眾樂樂,選出當中之『最』,希望大家不會像我笑到悲從中來!
最好笑的留言:『呢行好多機師、企鵝、手機王、口水佬、波友、性格大師』。
實在形容得非常貼切活潑生動,超越我的動物扮公室!機師專門放飛機。企鵝企定定唔郁包括手和腳,不過非常好胃口食到肚滿腸肥。手機王不論任何時候做甚麼都機不離手。口水佬得把口,講就天下無敵,做就冇心冇力。波友顧名思義就是最識射波。性格大師當然最有主見又有脾氣,拍枱唔做有幾難,究竟誰怕誰?
最嘩然的留言:『當我聽到有餐廳,請洗碗工要出到60k但願意嚟見工嘅寥寥可數,覺得好匪夷所思』。
原來六萬元是包場價,一日最少10個小時不停洗,還要年終無休365日日返足,要放假休息請病假,就要包埋請替工,總之一定要有人返工。計一計條數,一日10個鐘一個月30日即是300個鐘,平均$200一個鐘,好高人工喎! 為甚麼這一份筍工竟然冇人肯做?點解呢?點解呢?
最考我的留言:『以妳豐富的HR 經驗,這個問題,是員工自身的問題或是公司大圍環境的問題?』。
答案是社會的問題!因為不再是人浮於事了,不用擔心沒有工作會食西北風的情況之下,求職者可以afford賦閑在家慢慢挑選合心水的工作。另外就是太多公司老闆思想作風沒有與時並進,以前升職加薪打工仔夢寐以求,今日升職加薪打工仔拒絕唔要,為甚麼會有這種現象出現??那麼要的究竟是甚麼?老闆們,你們可有答案?
題外話,剛剛看到報紙食物環境衞生署招聘二級衞生督察,毋須任何工作經驗亦不需要大學畢業,只需要有相關學科高級文憑或副學士學位即可申請。工作包括巡查檢控牌照事務處理投訴,指指點點行行企企入職就有30k,薪酬頂點是50k,做滿3年可正式成為公務員。
Title高Package正,珠玉在前怪不得我請人如此難!我自嘆不如,低頭繼續練功先!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】本港無人駕駛自動車最快本月底試運,你會否乘坐?► 立即投票