好多人話新年應該有新希望，不過睇到踏入另一十年開始嘅第一個立法會，你就會覺得香港希望好渺茫下。

　　新一年第一個大會，政府將《2019僱傭（修訂）條例草案》排上大會首讀同二讀，內容包括將產假由目前10個星期延長至14星期。呢個理應無乜議員夠膽反對(部分商界為表示不滿除外)嘅議案，因為內務委員會仲未有著落之下，最終由政府動議繞過內會，建議喺事務委員會傾完之後就再上大會，情況有如當日《逃犯條例》。

　　咁嘅政治環境之下，泛民唔理呢條法案對打工仔係幾咁有利、唔理有幾多準爸爸媽媽希望法例快啲過度，佢地仍然反對政府咁做、仍然堅持政府要走返內會成立法案委員會條路(但呢條路明明就係泛民擋住咗)，更加喺會議期間再次突襲點人數，最終搞到流會收場。

　　建制派嘅情況就更可笑。噚日流會之後，一眾建制派急急出嚟開會鬧爆泛民搞到流會，有班後生嘅建制派仲搞facebook直播，坐埋一檯「論盡泛民」，將泛民彈到體無完膚。

　　Tina好老實咁講，你地咁樣亦都唔會得到支持者掌聲，道理好簡單，泛民打咩牌大家都心裏有數，議員們個個月薪十萬再加津貼等等，年薪百幾萬，要你班建制派每個會乖乖地留低開個會投個票，都唔係過分嘅要求；再加上之前已經修改咗議事規則令到流會機會大減，但偏偏建制仲係咁樣將過失瀨落泛民身上，你坐定定齊人，泛民係連點人數嘅機會都無，咁樣仲點怨得人係始作俑者？講到條例對打工仔係幾咁重要，點解唔留晒喺立法會準備打仗？

　　所以Tina真心認為，立法會已經去到一個無法正常運作嘅地步，泛民只講政治不顧民生故然係主因，建制派亦喺區選大敗之後無好好諗清楚自己點解輸得咁轟烈，一種諉過於人嘅心態仍然烙印喺心入面，絕無半點反醒。可恨嘅係，香港政府形態只能夠喺呢兩班之中二選一，今年立法會選舉完成後，見唔到爛攤子可以點樣收拾，倒不如解散成個立法會吧！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇