執筆之時，政府剛剛公布特首林鄭月娥將會喺今日（18日）四點見記者，估計會宣布正式撤回逃犯條例修訂同埋向公眾「親身道歉」。不過呢個遲來嘅道歉，可以得到反對派嘅原諒、支持者嘅原諒嗎？

　　過去一個多星期，係香港近年最政治動盪嘅時刻，比年雨傘運動，絕對係有過之而無不及。唔理係唔係真係百萬人上街，但連續兩個星期日有咁大規模嘅遊行，呢一屆政府嘅管治，如果係民選政府的話老早已經掉咗落懸崖。

　　好早已經講過，呢個逃犯條例係一個政治炸彈，但相信無人估到個炸彈威力匹比核彈。偏偏林鄭早早唔拆彈不突止，喺建制歸隊、立法會夠票應該萬無一失之下繼續走強人路線，一路添火藥，造就今次全球關注嘅政治風波，為林鄭嘅特首成績表，蓋上一隻大大隻黑豬。

　　道歉估計都難以修補同反對逃犯條例市民之間嘅裂痕，最大問題就係，林鄭同建制派、同警隊之間嘅裂痕都難以修補。聽聞，林鄭撤回條例之後建制派怨聲載道，因為有部分建制派的而且確多次私底下同林鄭分析形勢，希望林鄭唔好去到咁盡，要吸納反對派嘅意見去做修例；可惜林鄭嘅精英心態再加上佢嘅「初心」，令到事件一發不可收拾。有建制派同Tina講：「今次林鄭係搵咗成個建制派陪葬，功能組別都好少少，我地呢班跑區嘅真係多得佢地唔少，最慘係以前可以後生投泛民、父母投建制，依家連父母都畀後生影響埋，今年區議會議席有少無多，只希望立法會(選舉時)市民淡忘咗，無輸得咁慘！」

　　林鄭政府事件之後嘅表現亦令到警隊上下「暗罵」。有幫辦透露，警隊做好佢地應份嘅工作，保護立法會安全，但換來全港唾罵，有警員被起底壓力可想而知，而普通軍裝警員當更日日畀市民鬧，又無得還口，全港警員壓力接近爆煲邊緣。「林鄭一個人累咗我地成個警隊形象，道歉可以補償到咩？！」相信係唔少警員嘅心底話。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票