2021-06-08
親選MIRROR小鮮肉拍戲 吳君如睇中呂爵安乜都肯做
【晴報專訊】吳君如、鄭中基(Ronald)、梁詠琪(GiGi)及MIRROR成員呂爵安(Edan),昨日出席主演的賀歲片《闔家辣》開鏡。身兼監製的君如對新人Edan讚不絕口,更大爆電影中將有「自肥」場面︰「我同Edan有好多感情戲!」
吳君如(右二)出任賀歲片監製,找來呂爵安、梁詠琪及鄭中基組成全新搞笑陣容。
吳君如昨日獲老公陳可辛陪伴出席開鏡,君如笑言開拍《闔家辣》,全因一次獲邀去餐廳食火雞餐,當時遇上新導演鄭晉軒,對方講及家中在疫情下的遭遇,君如覺得非常好笑,便改編成新片《闔家辣》,更交由鄭晉軒執導。演員方面,君如表示需要一個識演喜劇及正劇的靚女,所以梁詠琪是她心中不二之選︰「我哋好多年無見,好彩GiGi依然咁天然美。」
鄭中基開心價接戲
提到找來鄭中基演男主角,君如笑說︰「我見佢開完騷就『失業』,今次角色好適合佢,但我搵唔到佢,於是將劇本交畀佢樓下看更,再轉交畀佢。」原來Ronald完騷後「大昏迷」一天,所以相隔一日才回覆君如答應演出。Ronald表示今次以開心價接拍電影︰「大家都無托手踭,有人仲提出話唔收分紅,我太耐無拍戲,加上同GiGi已十年無合作。」
呂爵安(右一)除了拍戲,還要拍攝遊戲節目《膠戰2》,相當忙碌。
至於第一次合作的影壇新人Edan,君如大讚︰「我睇過Edan啲搞笑片,所以邀請佢試鏡,我試MIRROR鏡喎,係咪作死!花姐(黃慧君)話『如果試咗唔得,唔使夾硬用』,但我試完幾鍾意就用佢。我同Edan有好多親密感情戲,但親密有好多種,總之我哋一家四口感情好好啦。」君如不肯透露眾人角色,Edan賣口乖說︰「我演君如阿哥!」獲君如大呼「識講嘢」。君如繼續讚美說︰「Edan同以前嘅『小鮮肉』好唔同,佢乜嘢對白都肯講,完全無偶像包袱。」Edan坦言今次以學習心態演出,雖然面對前輩有壓力,但十分開心和珍惜今次拍戲機會。
轉載自: 晴報
【你點睇】巴黎奧運正式閉幕,今屆你感到最深刻的地方是?► 立即投票