林鄭fb：對話平台，上線囉～

　　逃犯條例風波開始之後，特首林鄭月娥都主力同唔同社會賢達、上流商家閉門傾計，傾完一輪之後終於輪到一眾蟻民百姓，可以公開同佢傾下計，但係想同林太訴衷情，都唔係易事，事關首場「社區對話」名額得150人Only，簡直絕望過絕望座位表。據Jenny所知，截至上星期六下晝，網上登記嘅參加者已經Over萬7人，仲未計親身去各區民政諮詢中心交登記表嘅人！

　　唔知係咪反應熱烈，令到林太心花放呢？佢今日就喺Facebook出Po，Upload咗張石縫中長出幼芽嘅相，Caption就寫「再艱難，也有出路，讓我們對話」 、「對話平台正式啟動」。有人會覺得相張有絕處逢生之意，之不過Jenny就覺得，張相有少少出事喇，因幼芽喺石屎地生出來，根就唔會深……

　　睇返網民反應先，個Po出咗半日已有萬6個「嬲嬲」，「Like」加「心心」夾埋就有3000個左右啦，留言就隊形十足寫「五大訴求、缺一不可」。畀在Jenny係市民，咩立場都好啦，見到絕望座位表點都好難Like，希望聽日抽唔中嘅人，唔好去facebook大派「喊喊啦」！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票