美共和黨員因乜事點名制裁葉劉? 葉劉怒回：我冇做過!

 　　美國國會復會喇!一早放風話優先處理和審議《香港人權與民主法案》，唔少示威者都好想美國通過。響呢條法案通過前，有網民就喺Twitter建議美國不如先用「全球馬格尼茨基法案《The Global Magnitsky Human Rights Accountability Act》」，制裁阻礙香港落實民主普選，同破壞香港自治嘅官員同警隊云云，點知畀美國共和黨海外事務組織（Republicans Overseas）副主席俞懷松（Solomon Yue）Share咗，仲話葉劉淑儀係「好人選」!你話葉太點會唔嬲到爆炸!

Solomon Yue:不如制裁葉劉吖!

　　呢個Solomon Yue好大的膽子啊!佢轉截個Post，仲要加把口，提議不如將葉劉列入制裁名單呢，話佢係「She seems to be a good candidate for the Magnitsky list.(好人選)」葉太知道之後，嬲到呢......大叫「完全荒謬!」話Solomon Yue胡說八道。葉太仲大大呼冤，「我冇做過侵犯人權同腐敗行為!」、「都唔知共和黨係咪真係有(Solomon Yue)呢個人!」。等Jenny幫葉太你fact check 啦!共和黨真係有呢個人，佢個組織Republicans Overseas亦係有共和黨全國委員會認證嘅!放心啦!

2016年通過馬格尼茨基法案覆蓋全球

　　葉太嬲豬咁話，個法案2012通過嘅，主要係針對涉及馬格尼茨基案件同埋啲俄羅斯官員「唔知關香港乜事」，法案係針對官員，唔係非民選議員囉!Jenny就翻查資料，發覺美國國會2016年通過咗將法案覆蓋範圍擴展至全球......不過，冇事嘅!葉太你又冇做過咩，咁係唔會令你驚㗎!係咪先?

　　講時講，葉太同容海恩(Eunice)噚日同美國駐港澳總領事史墨客見咗個面，強烈呼籲美國國會唔好通過《香港人權與民主法案》。嗯!明嘅!明嘅!啲外國人成日說三道四，真係令葉太頭痛㗎啫!

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇